Літва ў тры разы павялічыць выплату мігрантам, якія добраахвотна пагодзяцца вярнуцца на радзіму
Міністр унутраных спраў Літвы Агне Білатайце павялічыла ў тры разы выплату мігрантам, якія добраахвотна вырашаюць вярнуцца на радзіму. Яна складзе 1000 еўра, паведаміла міністэрства ў сераду, піша Delfi.lt.
«Вяртанне мігрантаў у краіны паходжання з'яўляецца складаным і доўгім працэсам. Утрыманне аднаго мігранта абыходзіцца Літве ў год у 11 тыс. еўра — гэта насамрэч вялікі цяжар для дзяржавы. Мы шукаем спосабы, як заахвоціць да вяртання і спадзяемся, што павышэнне выплаты павысіць колькасць тых, хто вырашыў вярнуцца», — сказала Білатайце.
Міністэрства адзначае, што асноўная частка гэтых выплат будзе фінансавацца за кошт сродкаў, прадастаўленых Літве Еўракамісіяй на барацьбу з міграцыйным крызісам.
Паводле інфармацыі МУС, Дэпартамент міграцыі завяршыў разгляд прашэнняў аб прытулку мігрантаў, якія незаконна трапілі ў Літву з Беларусі. Яны былі зарэгістраваныя летам і ў верасні.
З 3272 заяў прытулак прадастаўлены 54 замежнікам — астатніх чакае высылка з краіны.
Прытулак дадзены грамадзянам Сірыі, Емена, Ірака, Эрытрэі, Афганістана. Яны атрымаюць дазвол на жыхарства ў Літве і будуць удзельнічаць у праграме інтэграцыі.
Цяпер чытаюць
18‑гадовы былы палітвязень расказаў, што ён сваяк Ціханоўскай. Яго затрымалі, калі ён ехаў ваяваць за Украіну2
Каментары