20-гадоваму студэнту Арцёму Баярскаму, які адмовіўся ад прэзідэнцкай стыпендыі, далі пяць гадоў калоніі

Сам суд праходзіў у закрытым рэжыме па хадайніцтве пракурора Вольгі Дындзілевіч. Вядома толькі, што Арцёма абвінавачвалі ў адміністраванні тэлеграм-канала «Мая краіна Беларусь» і тэлеграм-чата «Я выхожу/МКБ», а таксама ва ўдзеле ў маршы 25 кастрычніка 2020 года.

За кратамі хлопец утрымліваецца восем з паловай месяцаў.

Хто такі Арцём Баярскі

20-гадовы Арцём Баярскі, ураджэнец Гродна, да затрымання вучыўся на хімічным факультэце БДУ. Ён чатыры разы станавіўся стыпендыятам спецыяльнага фонду прэзідэнта па падтрымцы таленавітай моладзі і адораных студэнтаў і навучэнцаў. Разам з іншымі студэнтамі, Арцём адмовіўся ад гэтай стыпендыі. 

Год таму пасля Маршу пенсіянераў яго жорстка затрымалі, збілі і арыштавалі на 15 сутак паводле «народнага» артыкула 24.23 КаАП. У сваім дзённіку Арцём падрабязна апісаў збіццё ў Ленінскім РУУСе:

«Калі завялі ў бус, мяне адразу ж пачалі біць. Білі ў асноўным кулакамі па твары, таксама закранула левую руку і левы бок. Паставілі сіняк пад левае вока, таксама быў моцны боль у раёне левай скроні. Невядомыя ў чорным патрабавалі назваць, дзе я жыву і вучуся, адначасна абсыпаючы мяне тумакамі і круцячы пальцы. Потым на двух пальцах быў моцны ацёк і яны балелі.

Пакуль везлі ў РУУС, у мой бок сыпаліся рознага кшталту пагрозы, абразы. Пагражалі, што адлічаць з універсітэта і я пайду ў войска. Сцвярджалі, што я праплачаны. Я вырашыў згаджацца з усім іх славесным патокам. Здаецца, гэта крыху супакойвала іх злосць, і яны пераставалі мяне біць.

У мяне знайшлі сцяг Хабараўска, зрабілі ў ім дзірку і напялілі мне на галаву. У такім «уборы» мяне даставілі ў РУУС Ленінскага раёна. Калі я выйшаў з буса, адчувалася, што ў мяне вока было прыпухлым і вельмі моцна балела галава».

Збівалі, каб атрымаць паказанні

Другі раз Арцёма затрымалі сёлета напярэдадні Дня волі — 24 сакавіка. Раніцай у інтэрнат да яго прыйшлі сілавікі — падставай стаў бела-чырвона-белы сцяг, які нібыта хтосьці вывесіў у пакоі. Усіх студэнтаў паклалі на падлогу і закавалі ў кайданкі, але забралі толькі Арцёма. Яго асудзілі на 25 сутак па арт. 24.23 КаАП, але потым выставілі абвінавачванне па крымінальным артыкуле за «стварэнне або кіраўніцтва экстрэмісцкім фармаваннем».

З Арцёмам запісалі «пакаяльнае відэа», дзе ён прызнаецца ў адміністраванні тэлеграм-канала і чата «Мая краіна Беларусь» (Я выхожу/МКБ). Але адчас допыту 19 красавіка хлопец паведаміў адвакату, што яго збілі дубінкамі, каб атрымаць відэа.

Сам Баярскі патлумачыў на апытанні, што яго білі ў будынку ГУБАЗіК на вуліцы Рэвалюцыйнай, калі апытвалі, ці датычны ён да тэлеграм-канала «Страйкам хімфака».

Нягледзячы на тое, што экспертыза выявіла ў Баярскага сінякі на ягадзіцах, галёнках і плячы, Цэнтральны раённы аддзел СК адмовіў студэнту ва ўзбуджэнні крымінальнай справы супраць супрацоўнікаў ГУБАЗіКа.

 27 кастрычніка, праз паўгода пасля затрымання Арцёма Баярскага і выстаўлення яму абвінавачвання па арт. 361-1 Крымінальнага кодэкса, МУС прызнала экстрэмісцкім фарміраваннем тэлеграм-канал «Мая краіна Беларусь» і чат «Я выхожу/МКБ».

• 0
• 0
• 0
• 0
• 0
• 0
• 0
• 0