У Ганконгу хамякоў падазраюць у тым, што яны разносяць каранавірус. 2 тысячы жывёлін усыпяць.
Хамякі трапілі пад падазрэнне пасля таго, як 23-гадовая супрацоўніца заамагазіна стала першым за тры месяцы чалавекам, які заразіўся дэльта-штамам каранавіруса. Пра гэта паведамляе выданне South China Morning Post.
Улады Ганконга мяркуюць, што гэта першы выпадак перадачы COVID-19 ад жывёлы да чалавека. Зараз у горадзе плануюць усыпіць каля дзвюх тысяч грызуноў з-за пагрозы далейшага распаўсюджвання віруса.
Мясцовых жыхароў папрасілі здаць усіх хамякоў, набытых пасля 22 снежня мінулага года. Менавіта ў гэты дзень у заамагазіны Ганконга паступіла новая партыя грызуноў, якія маглі быць заражаныя каранавірусам.
«Мы ацанілі рызыкі як адносна высокія, і таму прынялі рашэнне, заснаванае на патрэбах грамадскай аховы здароўя. Мы заклікаем усіх уладальнікаў хатніх жывёл выконваць строгую гігіену пры кантактах са сваімі гадаванцамі»,
— пракаментаваў сітуацыю міністр сельскай гаспадаркі Ганконга Люнг Сіў-Фай.
На гэтым фоне ў горад часова забаранілі ўвозіць дробных жывёл.
Падобная сітуацыя ў свеце ўжо была. У лістападзе 2020 года ўлады Даніі прынялі рашэнне забіць больш за 10 мільёнаў норак з-за пагрозы распаўсюджвання каронавіруса пасля таго, як у некаторых жывёл выявілі COVID-19. Мёртвых грызуноў хавалі ў 15 агульных магілах.
Каментары