ГУБАЗіК пахваліўся затрыманнем двух адмінаў тэлеграм-чатаў. Распавядаем, хто яны
Днямі сілавікі анансавалі затрыманне адміністратараў тэлеграм-каналаў, «звязаных з NEXTA».
У дзень завядзення на адміністратараў Nexta Сцяпана Пуцілы і Яна Рудзіка крымінальнай справы «за стварэнне тэрарыстычнай арганізацыі» ГУБАЗіК заявіў пра гучную спецаперацыю супраць антылукашысцкага падполля. Мы даведаліся, хто гэтыя людзі.
Першы з іх — ураджэнец Віцебска 27-гадовы Вадзім Васільеў. На відэа ён кажа, што быў адміністратарам чатаў «Віцебск 97%» і «Орша 97%» у жніўні 2020 года, тады іх набіралі літаральна па аб'явах. Аніякіх доказаў ягоных «злачынстваў» сілавікі не прыводзяць.
Хлопец па прафесіі быў асвятляльнікам шостага разрада і акцёрам тэатра і кіно. Навучаўся ў дзвюх установах — Віцебскім дзяржаўным ліцэі №5 прыборабудаўніцтва і Віцебскім дзяржаўным каледжы культуры і мастацтваў.
Доўгі час ён працаваў асвятляльнікам у Беларускім тэатры «Лялька» ў Віцебску, а апошнім часам у Цэнтры культуры «Віцебск».
Другі з хлопцаў — ураджэнец Гомеля 27-гадовы Аляксей Жылянін. На відэа ён прызнаецца, што быццам бы быў адным з адміністратараў чата «Гомель 97%» і быў неаднаразова судзімы.
Насамрэч, гэта зроблена шляхам мантажу, гаворка пра чат «Гомель — Волатава 97%». Ён налічвае ўсяго 41 падпісанта і не мае амаль аніякай актыўнасці.
Аляксей быў восем разоў асуджаны па палітычным артыкуле 23.34 КоАП (парушэнне парадку і правядзення масавых мерапрыемстваў), двойчы па артыкуле 17.11 КоАП (распаўсюд экстрэмісцкіх матэрыялаў) і двойчы па артыкуле 339 КК (хуліганства). Большасць артыкулаў 23.34 — за агітацыю ў чаце, у якім ён быў адміністратарам, для вельмі малой аўдыторыі.
Што датычыць нібыта «хуліганства», то яно звязанае з тым, што ён 26 кастрычніка 2020 года, у дзень абвешчанай Ціханоўскай агульнанацыянальнай забастоўкі, вывесіў бел-чырвона-белы сцяг на адной з дарог Гомеля разам з прадметам, падобным да выбухоўкі. Вось гэта і інтэрпрэтавалі як «хуліганства».
Аляксей меў, відаць, цяжкае дзяцінства. Ён быў раней судзімы — за спробу скрасці сумку ў мужчыны, калі быў у дзявятым класе і пасля за бойку з іншаземным студэнтам на прыпынку. Ён правёў некалькі год спачатку ў дзіцячай выхаваўчай калоніі, а пасля ў калоніі для дарослых.
-
«Нацыянальная ідэнтычнасць — найважнейшы інструмент супраціву рускаму міру»: Ціханоўская выступіла на Форуме імя Касцюшкі
-
Шукаюць намесніка ідэолага Брэсцкай вобласці. Прафесійныя патрабаванні сціплыя, а заробак кучаравейшы, чым у Мінску
-
Праваабаронцы паведамілі пра 30 ператрусаў у сваякоў эмігрантаў
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1818
Каментары