Аператары энергасістэм краін Балтыі — эстонскі Elering, латвійскі Augstsprieguma tīkls (AST) і літоўскі Litgrid — заключылі пагадненне, згодна з якім яны больш не будуць купляць расійскую электрычнасць, паведамляе err.ee.
Як адзначаецца ў паведамленні AST, для зніжэння залежнасці ад расійскай энергасістэмы рынак электраэнергіі краін Балтыі з 1 чэрвеня злучаны толькі з Польшчай і Скандынавіяй. Адной з прычын такога рашэння ў AST назвалі праблемы з плацяжамі, бо некалькі банкаў, праз якія раней пераводзіліся грошы ў РФ, цяпер апынуліся пад санкцыямі. Акрамя таго, краіны Балтыі не жадаюць здзяйсняць плацяжы расійскім кампаніям.
Паводле Elering, прынятыя меры знізяць залежнасць энергасістэм краін Балтыі ад рэзервовых магутнасцяў у РФ, якія задзейнічаюцца ў перыяды пікавай нагрузкі. Раней Эстонія, Латвія і Літва выкарыстоўвалі для забеспячэння стабільнай працы электрасеткі ў тым ліку паслугі расійскай энергакампаніі «Інтэр РАТ», але ў далейшым будуць карыстацца толькі рэзервовымі магутнасцямі, размешчанымі ў краінах Балтыі і Паўночных краінах.
Энергасістэма краін Балтыі захавае фізічнае падключэнне да расійскай сістэмы да сінхранізацыі з еўрапейскай энергасістэмай, якая павінна адбыцца да 2025 года.
Каментары