Фота: tibo.by.
У пачатку 2000-х TIBO была цікавая ўсім, хто хоць трохі цікавіўся тэхналагічнымі навінкамі. І тады на выставе можна было сапраўды паглядзець і памацаць рукамі інавацыі таго часу (якія сёння нам здаюцца банальнымі рэчамі). Напрыклад, выйсці з мабільнага тэлефона ў інтэрнэт, адправіць мультымедыйныя ММС-кі, паслухаць музыку з першых партатыўных MP-3 плэераў.
Усе апошнія гады выстава мала чым здзіўляла сваіх гасцей і не паказвала чагосьці прарыўнога, а сёлета TIBO ператварылася ў зусім дзіўнае відовішча, асноўнымі ўдзельнікамі якога сталі не гіганты тэлекамунікацыйнай галіны, а дзяржаўныя структуры, часам далёкія ад сферы.
Але цяпер выстава можа паказаць мала цікавых навінак, прынамсі, для звычайнага карыстальніка. Значную частку плошчаў у выставачным комплексе на праспекце Пераможцаў, 111а аддалі розным дзяржаўным ведамствам, а таксама адукацыйным установам, прычым не толькі вышэйшым, але і звычайным гімназіям і школам.
Буйных міжнародных вендараў (Samsung, Huawei, ZTE, HP, Panasonic і іншыя), якія звычайна ўдзельнічалі ў мерапрыемстве, няма. Затое на выставе было шмат чыноўнікаў у шэрых касцюмах з розных ведамстваў і арганізацый, а таксама сагнаных студэнтаў і школьнікаў. Форум стаў яшчэ больш панылым, асабліва на фоне замежных аналагаў.
Высокія тэхналогіі, звязаныя з вялікімі і рызыкоўнымі інвестыцыямі, абыходзяць Беларусь, а экспанаты дзяржаўных кампаній загнаныя ў выставачныя павільёны з-пад палкі профільнага ведамства. Незлічоныя дзяржаўныя і напаўдзяржаўныя кампаніі, камітэты, інстытуты — нічога, што магло б цікавіць у 2022 годзе нармальнага чалавека са сферы.
З вялікіх кампаніі на выставе прысутнічалі толькі тэлекамунікацыйныя гіганты кшталту А1, МТС і Белтэлекам.
І, ужо па традыцыі, паўсюль стэнды з лозунгамі кшталту «Беларусь — лічбавая краіна». Лічбавая краіна, якая ў пытаннях лічбавізацыі бюракратыі і дзяржаўных паслуг катастрафічна адстае ад усіх суседзяў (у тым ліку Расіі і Украіны).
Год за годам форум станавіўся толькі бяднейшым. Здавалася б — куды больш?
У 2019 годзе, калі выстава была ўжо малацікавай, у ёй удзельнічалі хаця б кампаніі кшталту Bel Huawei Technologies LLC ці EPSON, то ў 2022 няма і іх. Затое зараз стала нашмат больш устаноў адукацыі. Калі раней удзельнічалі пераважна тэхнічныя ВНУ, то цяпер ёсць нават сярэднія школы і гімназіі з Мінска і Віцебска. Ну і традыцыйна, шматлікія дзяржаўныя прадпрыемствы, накшталт «Белбланкавыд».
Сфера высокіх тэхналогій і тэлекамунікацый перажывае складаныя часы, асабліва пасля падзей 2020 года, калі многія айцішнікі падтрымалі рух супраць дыктатуры. IT-супольнасць актыўна ахвяравала грошы пацярпелым ад рэпрэсій, беларускія праграмісты выходзілі мітынгаваць у раёне Парку высокіх тэхналогій, а самі беларускія ўлады пачалі пераглядаць сваё стаўленне да індустрыі, бо бачаць у ёй класава варожы элемент. Масавыя рэпрэсіі і эканамічныя санкцыі супраць лукашэнкаўскага рэжыму не спрыяюць інвестыцыям, міжнароднаму супрацоўніцтву і развіццю высокіх тэхналогій. У выніку многія кампаніі, якія працавалі ў Беларусі, пачалі масавы рэлакейт спецыялістаў. Калі такое адбываецца нават з аўторсінгавымі кампаніямі, то што можна казаць пра высокатэхналагічныя інавацыйныя прадуктовыя кампаніі?
Выстава TIBO карысная тым, што яна — цудоўны індыкатар стану галіны і ўсёй беларускай эканомікі.
