У Расіі зʼявяцца аналагі савецкай «Бярозкі» — крамы для эліты з дэфіцытнымі таварамі

У Маскве і Пецярбургу адкрыюць крамы бязмытнага гандлю, якія будуць абслугоўваць дыпламатаў, консулаў і іх семʼі, а таксама супрацоўнікаў міжнародных арганізацый, размешчаных у Расіі, напісала ў сераду «Парламенцкая газета». Выданне першае правяло аналогію — у СССР была сетка магазінаў «Бярозка».

Аднак «Бярозка», у якой за валюту і чэкі маглі купляць дэфіцытныя тавары іншаземцы, а таксама дыпламатычныя і ваенныя спецыялісты, ўяўляла сабой разгалінаваную сетку.

Мяркуючы па пастанове ўрада, на якую спасылаецца «Парламенцкая газета», у цяперашніх рэаліях размова ідзе пакуль толькі аб двух магазінах — у Маскве і ў Пецярбургу.

Аднак выданне падае гэта як зʼяву і не баіцца пісаць у загалоўку: «У Расіі зʼявяцца магазіны, недаступныя для простых грамадзян».

Крамы будуць працаваць у рэжыме duty free. Прадаваць будуць алкаголь, тытунь, парфумерыю і касметыку, кандытарскія тавары, ювелірныя вырабы, смартфоны, гадзіннікі.

Усе пералічаныя групы тавараў пацярпелі пасля рашэння найбуйных сусветных кампаній пакінуць Расію ў адказ на ўварванне ва Украіну. У ліпені аб канчатковым рашэнні спыніць бізнэс у краіне абвясціла кампанія Philip Morris — вытворца Marlboro, які ў савецкія гады можна было купіць толькі ў «Бярозцы». У канцы чэрвеня аб сыходзе абвясціла кампанія Diageo — вытворца Johnnie Walker.

Расійскія крамы электронікі пачалі прадаваць ужываныя смартфоны. Папулярная сетка крам адзення H&M у жніўні часова адкрыла крамы, зачыненыя ў сакавіку пасля ўварвання, каб распрадаць рэшткі і сысці з расійскага рынка. У магазіны выстраіліся вялізныя чэргі.

На гэтым фоне навіна пра аналаг «Бярозкі» стала хутка распаўсюджвацца ў расійскіх СМІ.

«Гэтыя гандлёвыя кропкі даюць магчымасць дыпламатам свабодна купляць тавары, якія яны не могуць завезці або купіць у краіне знаходжання», — прызнаў у размове з «Парламенцкай газетай» намеснік старшыні камітэта Савета Федэрацыі па міжнародных справах Уладзімір Джабараў.

Павялічыць

Купіць тавары ў крамах бязмытнага гандлю можна будзе толькі ў розніцу і пры прадʼяўленні дакументаў, якія пацвярджаюць службовае становішча і акрэдытацыю пры МЗС Расіі, папярэджвае выданне. Дыпламатам дазволілі аплачваць тавар не толькі рублямі, але доларамі і еўра.

З самага пачатку знаходжання Уладзіміра Пуціна ва ўладзе яго эпоху прынята характарызаваць як «спробу аднаўлення Савецкага Саюза». Аднак, мабыць, толькі ў апошнія месяцы параўнанне з СССР стала такім відавочным.

• 1
• 0
• 45
• 10
• 2
• 3
• 2
• 0