Ліверпульскі «Эвертан» — супернік барысаўскага БАТЭ у Лізе Еўропы — у суботу 26 верасня ў матчы чарговага туру англійскай прэм’ер‑лігі перамог у гасцях аўтсайдэра «Портсмут» з лікам 1:0.
На 42‑й хвіліне адзіны гол у сустрэчы забіў французскі форвард Луі Саа (які, праўда, праз дыскваліфікацыю ў Мінск не прыедзе).
Гэта чацвертая запар перамога «Эвертана» (з улікам еўракубкаў і Кубка Лігі) пасля правальнага старту ў прэм’ер‑лізе.
У першынстве Англіі клуб мае 50% вынік: тры перамогі і тры паразы ў шасці гульнях (баланс мячоў 8 — 10). Стартавалі, дарэчы, падапечныя Дэвіда Мойеса з разгромнай паразы на сваім стадыёне ад «Арсенала» — 1:6.
***
Пераможная серыя пачалася 17 верасня,калі ў першым туры Лігі Еўропы «ірыскі» разграмілі ў Ліверпулі афінскі АЕК — 4:0, у туры прэм’ер‑лігі 19 верасня яны перамаглі «Блэкберн» — 3:0, у гэтую сераду ў матчы Кубка Лігі у гасцях разграмілі «Халл» — 4:0.
Што да іншых супернікаў БАТЭ.
«Бенфіка» сёння згуляе з «Лейшоэшам», (пачатак у 23:15) а АЕК (ён пасля чатырох тураў ідзе 4‑м, маючы сем балаў) — у нядзелю з лідэрам грэцкага першынства «Панацінаікасам».
БАТЭ у нядзелю ў Лунінцы будзе гуляць супраць мікашэвіцкага «Граніта» (гэта матч 21-га туру чэмпіянату Беларусі). Пачатак матчу а 16-й.
Матч 2-га туру Лігі Еўропы БАТЭ — «Эвертан» пройдзе 1 кастрычніка на мінскім стадыёне «Дынама» (пачатак а 20‑й).
У гэты ж дзень АЕК у Афінах прыме «Бенфіку», у Мінску грэкі згуляюць 22 кастрычніка.
Каментары