Мэра Харкава Ігара Церахава аштрафавалі на 3 400 грыўняў (92 даляры) за звароты да жыхароў горада на рускай мове, а не на дзяржаўнай украінскай. Пра пакаранне харкаўскага мэра паведаміў украінскі ўпаўнаважаны па абароне дзяржаўнай мовы Тарас Крэмень.
Моўны омбудсмен вынес пастанову аб накладанні штрафу ў памеры 3400 грыўняў.
У дакуменце сказана, што Церахаў у зваротах да жыхароў Харкава ў эфіры агульнанацыянальнага тэлемарафону выкарыстаў недзяржаўную мову, чым парушыў ч. 1 арт. 12 закона аб мове.
Таксама Церахаву вынесена папярэджанне за парушэнне ч. 6 арт. 27 закона, якая прадугледжвае, што афіцыйныя старонкі мэра ў фэйсбуку і тэлеграме павінны ўтрымліваць публікацыі на дзяржаўнай мове.
Моўны омбудсмен таксама нагадаў, што летась ужо былі ўстаноўленыя факты выкарыстання дэпутатамі Харкаўскай гарадской рады, у тым ліку Церахавым, недзяржаўнай мовы падчас ажыццяўлення сваіх паўнамоцтваў. Тады былі складзеныя акты і пратаколы аб парушэннях, а таксама ў гарадскую раду Харкава неаднаразова накіроўваліся лісты з тлумачэннямі нормаў закона.
Закон пра дзяржаўную мову Украіны, на які абапіраецца моўны омбудсмен, быў прыняты ў красавіку 2019 года, а 16 ліпеня ён набыў сілу. Тым не менш, дагэтуль здараецца, што некаторыя дзяржаўныя чыноўнікі, асабліва ў рэгіёнах з перавагай рускамоўнага насельніцтва, выконваюць яго не вельмі строга.
Цяпер чытаюць
У беларускі ў Італіі забралі двух сыноў — бо яна не прызнавала дзяржаву і не адпускала дзяцей у школу і да доктара6
Каментары