Вынесены прысуд палітвязню Дзмітрыю Дубоўскаму. Канчатковы тэрмін — 20 гадоў калоніі
Сёння, 25 лістапада, у судзе Заводскага раёна Мінска агучаны прысуд актывісту анархічнага руху, палітвязню Дзмітрыю Дубоўскаму. Справу разглядаў суддзя Алег Каляда, пiша «Вясна».
Яго прызналі вінаватым паводле ч. 2 арт. 339 («Хуліганства») і ч. 2 арт. 218 Крымінальнага кодэкса («Наўмыснае знішчэнне або пашкоджанне чужой маёмасці») і асудзілі да пяці гадоў пазбаўлення волі ў калоніі ўзмоцненага рэжыму.
Паколькі раней мужчыну ўжо асудзілі да 18 гадоў калоніі ўзмоцненага рэжыму, шляхам частковага складання пакаранняў, канчаткова Дзмітрыя Дубоўскага асудзілі да 20 гадоў пазбаўлення волі ў калоніі ўзмоцненага рэжыму.
Падрабязнасці судовага працэсу паведамілі праўладныя тэлеграм-каналы. Праз іх стала вядома, што цяпер Дзмітрыя абвінавачвалі паводле падзей у Мінску і Салігорску ў 2009 і 2010 гадах. Тады ў Мінску на тэрыторыю Мінабароны закінулі дымавую шашку, пасля чаго на праезнай частцы адбылася акцыя, падчас якой скандавалі лозунгі. Таксама Дубоўскага абвінавачваюць у тым, што ён закінуў у акно апорнага пункта ў Салігорску факел, разбіў кавалкам тратуарнай пліткі шкло ў Доме прафсаюзаў і прыняў удзел у падпале філіялаў банка ў Мінску. Таксама яго абвінавачваюць паводле падзей у верасні 2010 года, калі былі падпаленыя дзверы КПП на Акрэсціна.
Каментары