У Беларусі чыноўнікаў і вайскоўцаў будуць расстрэльваць за здраду дзяржаве
Палата прадстаўнікоў у першым чытанні прыняла законапраект «Аб змяненні кодэксаў па пытаннях крымінальнай адказнасці».
Ім прадугледжваецца, што смяротнае пакаранне можа быць прыменена да службовай асобы ці вайскоўца, якія здрадзілі дзяржаве.
«У мэтах аказання стрымліваючага ўздзеяння на дэструктыўныя элементы, а таксама дэманстрацыі рашучай барацьбы са здрадай дзяржаве праектам Закона прапануецца ўнясенне змяненняў у санкцыю часткі 2 артыкула 356 КК, якія прадугледжваюць магчымасць прымянення выключнай меры пакарання ў выглядзе смяротнага пакарання за здраду дзяржаве, учыненай службовай асобай, якая займае дзяржаўную пасаду, або асобай, на якую распаўсюджваецца статус вайскоўца. У гэтай сувязі прыводзяцца ў адпаведнасць таксама артыкулы 58 і 59 КК», — гаворыцца ў праекце.
Таксама праектам закона ўносіцца змяненне ў артыкул 360 КК — мэтай здзяйснення злачынства замест нанясення шкоды эканамічнай бяспецы і абараназдольнасці становіцца прычыненне шкоды эканамічнай і (або) ваеннай бяспецы. Таксама артыкул 360 КК дапаўняецца заўвагай, якая дапускае вызваленне асобы ад крымінальнай адказнасці за падрыхтоўчыя дзеянні да дыверсіі ў выпадку яе прадухілення.
Апроч таго, у дыспазіцыю артыкула 3691 КК уносіцца дадатак «у мэтах устанаўлення адказнасці за распаўсюд заведама лжывых звестак, якія дыскрэдытуюць Узброеныя сілы, іншыя войскі і воінскія фарміраванні, ваенізаваныя арганізацыі Рэспублікі Беларусь».
«Увядзенне такой прававой нормы будзе з'яўляцца дзейснай прэвентыўнай мерай распаўсюду заведама лжывай, не адпаведнай рэчаіснасці інфармацыі аб беларускай арміі і іншых сілавых структурах», — гаворыцца ў праекце.
Каментары