У мемуарах прынца Гары «Запасны» (Spare), якія яшчэ не выйшлі ў свет, ёсць сенсацыйныя заявы і абвінавачванні ў адрас членаў каралеўскай сям'і — ад ужывання какаіну і марыхуаны самім Гары, яшчэ ў школьным узросце і проста ў школьных сценах, да рукапрыкладства прынца Уільяма, піша газета Guardian, у распараджэнне якой трапіла копія кнігі.
Як адзначае рэдакцыя Guardian, аўтабіяграфія прынца, складзеная прафесійным мемуарыстам Дж. Р. Мэрынгерам, напісана ў вельмі асабістым ключы і закранае ўсіх блізкіх сваякоў Гары, гэта значыць, усіх членаў каралеўскай сям'і.
Пакуль незразумела, ці ёсць там якія-небудзь сенсацыйныя адкрыцці з нагоды памерлай каралевы Лізаветы II і яе мужа, герцага Эдынбургскага Філіпа. У тых фрагментах кнігі, што пераказвае Guardian, пра бабулю і дзядулю прынц не згадвае.
У Кенсінгтонскім і Букінгемскім палацах (рэзідэнцыях прынца Уільяма і караля Карла III адпаведна) каментаваць скандальныя ўцечкі адмовіліся.
На англійскай мове мемуары павінны выйсці 10 студзеня. Іспанамоўная версія «Запаснога» ўжо апублікаваная, і некаторыя брытанскія СМІ (у тым ліку і Бі-бі-сі), паспелі часткова з ёй азнаёміцца.
Бі-бі-сі распавядае аб самых вострых і неадназначных фрагментах кнігі.
Гары і Уільям прасілі бацьку не жаніцца з Камілай
У сваёй кнізе Гары піша, што яны з братам прасілі бацьку не браць шлюб з Камілай — на той момант Паркер-Боўлз, а цяпер каралева-консорт Карла III — і паасобку сустракаліся з ім для размовы да таго, як адбылося вяселле.
Па словах Гары, ён баяўся, што Каміла стане для іх з братам злой мачахай, але ў глыбіні душы яны з Уільямам былі гатовыя дараваць ёй усё, калі бацька будзе з ёй шчаслівы.
Калі менавіта адбылася размова Гары з Камілай, якая яшчэ не ажанiлася з яго бацькам, з апублікаваных урыўкаў незразумела, таму мы не ведаем, колькі гадоў было прынцу на той момант. Сам шлюб прынца Чарльза — а цяпер караля Карла III — адбыўся ў 2005 годзе.
Вядзьмарка перадала «пасланне ад Дыяны»
Прынц Гары апісвае, як непераадольны смутак па загінулай маці, прынцэсе Дыяне, прывёў яго да нейкай жанчыны, якая сцвярджала, што мае дар уваходзiць у кантакт з іншым светам.
«Твая мама кажа, што ты жывеш жыццём, якое сама яна пражыць не змагла. Ты жывеш жыццём, якога яна для цябе і хацела», — нібыта сказала яму чараўніца.
Прынцэса Дыяна загінула ў Парыжы ў 1997 годзе, калі Гары было 12 гадоў.
У кнізе Гары толькі сцісла распавядае аб размове з яго памерлай маці, піша Guardian.
Калі і дзе адбылася яго сустрэча з вядзьмаркай — таксама незразумела.
Чарльз не абняў Гары пасля смерці Дыяны
У сваіх мемуарах Гары ўспамінае, як бацька падышоў да яго, каб паведаміць трагічную навіну пра гібель Дыяны ў аўтакатастрофе, — і не абняў яго ў той момант.
Зрэшты, піша прынц, нават у звычайных абставінах яго бацька «ніколі не ўмеў праяўляць свае пачуцці».
Уільям накінуўся на Гары, збіўшы яго з ног
Гары сцвярджае, што падчас адной са сварак з братам з нагоды яго жонкі Меган, той схапіў яго за каўнер, парваўшы шнурок, які вісеў на шыі, і паваліў на падлогу. Адбылося гэта ў лонданскай рэзідэнцыі Гары, то бок Уільям быў у яго ў гасцях, таму, падняўшыся на ногі, Гары адмовіўся даць брату здачы (на што той яго актыўна правакаваў) і загадаў яму вымятацца.
Паводле Гары, канфлікт пачаўся з-за эпітэтаў, якія Уільям дазваляў сабе ўжываць у бок яго жонкі Меган Маркл. У прыватнасці, той нібыта назваў яе «difficult» («цяжкай», «нязручнай»), «rude» («грубай», «непаважлівай», «няветлівай») і «abrasive» («непрыемнай», «раздражняючай»).
Супрацьстаянне нарастала, піша Гары, па меры таго як Уільям усё больш «бяздумна паўтараў плёткі прэсы». А потым справа нібыта дайшла і да рукапрыкладства.
Вось як апісвае падзеі Гары: «Ён паставіў шклянку з вадой, зноў мяне абазваў, а потым накінуўся. Усё адбылося так хутка. Вельмі хутка. Ён схапіў мяне за каўнер, парваўшы шнурок, які вісеў на шыі, і паваліў мяне на падлогу».
«Я павалiўся спінай на сабачую міску, якая ў выніку трэснула і ўпілася ў мяне сваімі аскепкамі, — працягвае Гары. — Нейкі час я ляжаў там, зусім аслупянеўшы [ад таго, што здарылася], пасля чаго падняўся на ногі і загадаў яму вымятацца».
Уільям і Кейт смяяліся з касцюма нацыста, які Гары абраў для вечарынкі
У мемуарах сцвярджаецца, што Уільям і Кэтрын смяялiся, калі Гары на маскарад у 2005 годзе заявіўся ў форме з сімволікай нацысцкай Германіі.
Па словах Гары, магчымыя варыянты касцюма для вечарынкі ён абмяркоўваў з братам і нявесткай напярэдаднi, яму было важна іх меркаванне.
Ён падрабязна апісвае, як папрасіў іх дапамагчы яму выбраць паміж касцюмамі пілота і нацыста.
«Я патэлефанаваў Уілу і Кейт і спытаў, што яны думаюць. Яны сказалі: нацысцкая форма. Я ўзяў гэты касцюм напракат, разам са смешнымі вусамі, і вярнуўся дадому. Уільям і Кейт рагаталі. Гэта было нават горш, чым леапардавае трыко Уіла, значна больш недарэчна».
Гары было 20, калі таблоід Sun апублікаваў на першай паласе фатаграфію, на якой ён апрануты ў нацысцкую форму на тэматычнай вечарыне «Карэнныя і каланізатары».
Як Гары пазбавіўся цнатлівасці
Гары адкрыта кажа, што першы сэксуальны досвед у яго здарыўся ў 17 гадоў.
Гэта адбылося ў полі за пабам з жанчынай, якая была старэйшая за яго.
Партнёрка абыходзiлася з ім «як з маладым жарабцом», піша Гары, і першы сэксуальны вопыт стаў для яго вельмі зневажальным.
Какаін у 17 гадоў і марыхуана ў Ітане
Гары распавядае, што яму прапанавалі панюхаць какаін, калі ў 17 гадоў ён быў у гасцях у знаёмых. Прынц прызнаецца, што некалькі разоў ужываў гэты наркотык, хоць, па яго словах, гэта і не прыносіла яму задавальнення.
«Гэта было не вельмі весела і не дало мне асаблівага адчування шчасця, як гэта адбывалася з іншымі. Затое я адчуваў сябе іншым чалавекам, а гэта і было маёй галоўнай мэтай. Я быў 17-гадовым хлопчыкам, гатовым паспрабаваць усё, што зменіць загадзя ўсталяваны парадак».
Ён таксама распавядае, як у гады вучобы ў Ітане курыў марыхуану ў ванным пакоі кампуса, пакуль яго целаахоўнікі-паліцыянты ахоўвалі будынак звонку.
Уільям быў незадаволены прысутнасцю Гары ў Ітане
«Ты не ведаеш мяне, Гаральд, а я — цябе», — нібыта сказаў брату прынц Уільям, калі той прыехаў на вучобу ў самы прэстыжны каледж Вялікабрытаніі.
Да таго часу Уільям правучыўся ў Ітане ўжо два гады, і, як ён сам прызнаваўся Гары, гэта месца стала для яго сховішчам ад сям'і.
«У яго не было цяжару ў выглядзе малодшага брата, які б лез да яго з роспытамі або ўтыкаў свой нос у яго кола зносін», — тлумачыць Гары пазіцыю Уільяма.
Гары папрасіў брата не турбавацца наконт яго і паабяцаў наогул забыцца, што яны знаёмыя.
25 забітых талібаў
Гары піша, што падчас службы пілотам верталёта ў Афганістане ў 2012-2013 гг. ён асабіста прымаў удзел у шасці баявых вылетах, кожны з якіх паражаў жывыя цэлі, але гэтыя забойствы прынц лічыў апраўданымі. Агулам пры яго непасрэдным удзеле былі забітыя 25 баевікоў-талібаў.
«Я зусім не ганаруся гэтай статыстыкай, але і сораму з гэтай нагоды не адчуваю, — піша прынц. — У запале і роспачы бітвы я не ўспрымаў гэтых 25 чалавек як людзей. Гэта былі пешкі, прыбраныя з дошкі. Дрэнныя хлопцы, ад якіх пазбавіліся да таго, як яны б пачалі забіваць добрых людзей».
Чарльз маліў Уільяма і Гары не біцца
Гары ўзгадвае, як у 2021 годзе, пасля пахавання дзеда — герцага Эдынбургскага — яны з Уільямам ледзь не пабіліся.
Прынц Чарльз літаральна ўстаў паміж сынамі і сказаў: «Калі ласка, хлопчыкі, не атручвайце мне апошнія гады жыцця».
Пра смерць бабулі Гары даведаўся не ад сям'і, а з навін
Па словах прынца Гары, пра смерць сваёй бабулі — каралевы Лізаветы II — ён даведаўся з навін сайта Бі-бі-сі. Калі яе стан стаў прыкметна пагаршацца, яму патэлефанаваў бацька, і Гары пачаў збірацца ў дарогу — у шатландскую рэзідэнцыю каралевы Балмарал, дзе яна была пад наглядам лекараў.
Аднак неўзабаве яму далі зразумець, што браць з сабой Меган не варта, вынікае з мемуараў. Гэтым Гары тлумачыць блытаніну, якая ўзнікла ў дзень смерці каралевы, калі прэса спачатку паведаміла, што Гары і Меган едуць разам, а потым — што Меган не будзе. Пры гэтым жонка прынца Уільяма Кейт таксама не паехала ў Балмарал.
Гары даведаўся, што каралева памерла, калі яго самалёт прызямліўся ў Вялікабрытаніі. Не ад сям'і, а з навін у тэлефоне, падкрэслівае ён у сваёй кнізе.
«Калі самалёт пайшоў на пасадку, загарэўся экран майго мабільнага. Прыйшло паведамленне ад Мег (Меган): «Патэлефануй мне, як толькі атрымаеш гэта». Я адкрыў сайт Бі-бі-сі. Мая бабуля памерла. Мой бацька стаў каралём», — піша прынц Гары.
Уільям — спадчыннік, Гары — запасны
Назва кнігі «Запасны», сцвярджае прынц Гары, абрана не выпадкова і мае глыбокі сэнс. Гэтае слова нібыта вымавіў яго бацька, як толькі ён нарадзіўся.
Рыфмаваны выраз «an heir and a spare» («адзін спадчыннік і адзін запасны») у брытанскай англійскай з'яўляецца устойлівым. У шляхетных сем'ях так прынята паўжартам называць двух дзяцей. Старэйшае дзіця павінна ўспадкаваць бацькоўскі тытул і стан, а малодшае служыць гарантыяй таго, што род не перапыніцца нават у тым выпадку, калі са старэйшым сынам нешта здарыцца.
«Выдатна. Ты дала мне аднаго спадчынніка і аднаго запаснога. Твая місія выкананая», — нібыта казаў тады прынц Чарльз прынцэсе Дыяне, сцвярджае Гары.
Ён удакладняе, што яму самому пра гэта распавялі, калі яму было ўжо 20, але сваю крыніцу аўтар мемуараў не называе.
Кошт шчырасці прынца Гары?
Грамадскасць востра цікавіць пытанне, колькі прынц Гары зарабіў на сваіх расповедах.
Памер яго ганарару афіцыйна не называецца, але, па некаторай інфармацыі, кампанія-выдавец Penguin Random House заплаціла аўтару аванс у 20 млн даляраў (прыблiзна 17 млн фунтаў).
Калі кніга выйдзе на брытанскі рынак, яна будзе каштаваць 28 фунтаў за цвёрды пераплёт і 20 фунтаў за аўдыяверсію. Памер накладу пакуль невядомы.
У заяве Penguin Random House гаворыцца, што не ўвесь прыбытак ад продажу кнігі пойдзе прынцу Гары, частка будзе выдаткаваная на дабрачыннасць.
У прыватнасці, вядома, што паўтара мільёна долараў плануецца перадаць арганізацыі Sentebale, якая падтрымлівае дзяцей і маладых людзей, заражаных ВІЧ, у Лесота і Батсване.
Каментары
ваў. дык я са шляхетнай сям'і... бо маці неяк і зусім не паўжартам была сказала, чаму нарадзіла другое дзіцё: "а раптам з табой нешта здарыцца. дык будзе яшчэ адно". мне было вельмі прыемна такое пачуць)