Беларускі фонд спартовай салідарнасці накіраваў у МАК заяву супраць допуску праўладных спартоўцаў на Алімпіяду
Беларускі фонд спартыўнай салідарнасці і больш за 50 тытулаваных спартоўцаў і прадстаўнікоў спорту падпісалі зварот у Міжнародны алімпійскі камітэт з нагоды магчымага ўдзелу спартоўцаў з Беларусі і Расіі ў Алімпійскіх гульнях—2024.
Аўтары звароту нагадваюць пра 200 спартоўцаў, якія загінулі падчас вайны ва Украіне, разбурэнне больш як 320 аб’ектаў спартовай інфраструктуры і адсутнасць эфектыўных магчымасцяў для падрыхтоўкі ўкраінскіх спартоўцаў.
«Больш за 20 беларускіх прадстаўнікоў спорту цяпер знаходзяцца за кратамі, сотні — зазналі рэпрэсіі і былі вымушаныя з'ехаць з краіны за тое, што заявілі пра сваё непрыняцце гвалту і выказалі прыхільнасць агульным алімпійскім каштоўнасцям. Гэтыя спартоўцы патрапілі пад палітычны пераслед, страцілі свае грамадзянскія правы і не могуць паўнавартасна працягваць спартыўную кар’еру, у тым ліку браць удзел у Алімпійскіх гульнях», — гаворыцца ў звароце.
Яго аўтары падтрымалі ўзмацненне спартыўных санкцый, якія ўжо дзейнічаюць супраць Беларусі і Расіі, і заклікалі МАК усебакова абараняць правы ўкраінскіх і беларускіх вольных спартоўцаў і спецыялістаў:
«Беларускім вольным спартоўцам трэба даць права ўдзельнічаць у спартовых спаборніцтвах і выратаваць іх ад пераследу з боку рэжыму Лукашэнкі за іх грамадзянскую пазіцыю», — гаворыцца ў заяве.
Таксама заяўнікі лічаць недастатковым крытэрыяльны механізм удзелу беларускіх і расійскіх спартоўцаў у міжнародных спаборніцтвах і прапануюць МАК укараніць эфектыўную сістэму праверкі расійскіх і беларускіх спартоўцаў на прадмет іх магчымага допуску да спаборніцтваў, якая «павінна грунтавацца на актыўнай антываеннай пазіцыі спартоўца, у тым ліку на падпісанні Антываеннай дэкларацыі».
Імёны спартоўцаў, якія падпісалі дэкларацыю, не публікуюцца «ў мэтах бяспекі», адзначылі ў Беларускім фондзе спартыўнай салідарнасці.
Міжнародны алімпійскі камітэт раней выступіў з заявай, у якой прапанаваў дазволіць беларускім і расійскім спартоўцам выступаць на міжнародных спаборніцтвах пад нейтральным сцягам, калі яны адкрыта не падтрымліваюць вайну Расіі супраць Украіны. Канчатковае рашэнне па гэтым пытанні не прынятае.
Каментары