Жыхар Светлагорска падраў куртку і звярнуўся з гэтым на прамую лінію намесніка губернатара. Што той адказаў?
Намеснік старшыні Гомельскага аблвыканкама Дзмітрый Алейнікаў правёў прамую тэлефонную лінію. З якімі пытаннямі людзі звяртаюцца да чыноўнікаў, піша «Гомельская праўда».
У асноўным жыхары вобласці скардзяцца на камунальныя праблемы, але адзін са зваротаў выбіваўся з агульнага шэрагу.
Жыхар Светлагорска на выхадзе з гандлёвага цэнтра зачапіўся за востры кавалак металу і падраў скураную куртку, якую ён купіў у Маскве за 300 даляраў.
Мужчына пайшоў да адміністрацыі з просьбай кампенсаваць нанесеную шкоду. Там яму прапанавалі адрамантаваць вопратку і, па словах пацярпелага, прыгразілі юрыстамі.
Светлагорац з такой прапановай не пагадзіўся (ён не хоча хадзіць у цыраванай куртцы) і не знайшоў іншага рашэння, як пазваніць намесніку губернатара. Дзмітрый Алейнікаў пазваніў у Светлагорскі райвыканкам і папрасіў тэрмінова выехаць на месца і разабрацца з кавалкам металу, які тырчыць.
Што чыноўнік загадаў зрабіць са скураной курткай жыхара Светлагорска, засталося па-за матэрыялам дзяржСМІ.
Каментары
цішэй, таварыш, цішэй.. не трэба так хвалявацца.. ліцій ужо на падыходзе)