Еўрапейскі саюз узгадніў пастаўку Украіне мільёна артылерыйскіх боепрыпасаў цягам года
Краіны Еўрасаюза ўзгаднілі пастаўку Украіне мільёна артылерыйскіх боепрыпасаў на працягу найбліжэйшых 12 месяцаў. Пра гэта паведаміў кіраўнік еўрапейскай дыпламатыі Жазэп Барэль, які назваў гэта «гістарычным рашэннем».
Згодна з планам, прадстаўленым Барэлем, краіны ЕС павінны «забяспечыць неадкладную дастаўку» Украіне «вялікай колькасці» боепрыпасаў, сярод якіх 155-міліметровыя артылерыйскія снарады з наяўных запасаў або з тых, «якія чакаюць замоў».
На рэалізацыю плана будзе выдзелена два мільярды еўра.
Акрамя таго, члены ЕС дамовіліся аб стварэнні камісіі па нарошчванні вытворчых магутнасцяў абароннай прамысловасці.
Рашэнне Еўрасаюза вітаў кіраўнік МЗС Украіны Дзмітрый Кулеба.
«Сёння 17 дзяржаў — членаў ЕС і Нарвегія падпісалі пагадненне аб сумесных закупках боепрыпасаў для Украіны і сваіх нацыянальных запасаў. Я вітаю гэты стратэгічны крок, які наблізіць нашу перамогу», — напісаў ён у твітары.
Кіраўнік Мінабароны Украіны Аляксей Рэзнікаў раней казаў, што Кіеву тэрмінова патрэбныя артылерыйскія боепрыпасы ў вялікай колькасці. Паводле яго ацэнкі, прапановы ЕС па выкарыстанні 1 мільярда долараў на закупку снарадаў будзе недастаткова.
Цяпер чытаюць
Што вядома пра экс-афіцэра Службы бяспекі Лукашэнкі Андрэя Спасава, якога пасадзілі за палітыку1
Каментары