За сакавік па крымінальных палітычных справах асудзілі не менш за 62 чалавекі
Праваабаронцы «Вясны» ў сакавіку фіксавалі працяг тэндэнцыі крымінальнага пераследу і асуджэння грамадзян паводле палітычных матываў. Агульная колькасць людзей, якія маглі быць рэпрэсаваны за мінулы месяц, складае прыблізна 162 чалавекі. Праваабаронцам вядома пра не менш як 62 асуджаных у крымінальным парадку грамадзян, з якіх 44 мужчыны, 18 — жанчын.
У адносінах да шасці чалавек вынесены абвінаваўчыя прыгаворы ў парадку завочнай вытворчасці (пяць чалавек па справе Каардынацыйнай рады і адзін чалавек па справе «Вясны»). Трэці месяц запар працягваецца тэндэнцыя сярод абласных судоў да ўзмацнення жорсткасці прысудаў, якія былі вынесены раённымі судамі. Магілёўскім і Віцебскім абласнымі судамі зменены пакаранні фігурантам дыфамацыйных спраў, асуджаных у канцы 2022 года, з «хатняй хіміі» на пазбаўленне волі.
Вярхоўны Суд змяніў прысуд Гродзенскага абласнога суда ад 17 кастрычніка 2022 года ў дачыненні да Мікалая Аўтуховіча ў частцы асуджэння паводле ч. 1 арт. 295-3 КК, Ірыны Гарачкінай у частцы асуджэння паводле ч. 1 арт. 405 КК — вырашана вызваліць іх ад прызначанага па названых артыкулах прысуду праз сканчэнне тэрмінаў даўніны.
Сумарна, па вядомых праваабаронцам фактах асуджэння, у сакавіку суды вынеслі:
- 166 гадоў 5 месяцаў пазбаўлення волі ў дачыненні да 36 чалавек;
- 55 гадоў 6 месяцаў абмежавання волі без накіравання ў папраўчую ўстанову («хатняя хімія») у дачыненні да 24 чалавек;
- 3 месяцы арышту для аднаго чалавека;
- 400 базавых велічынь на суму 488 400 рублёў у якасці дадатковага пакарання ў дачыненні да 12 чалавек, 11 з якіх асуджаны да пазбаўлення волі, адзін — да «хатняй хіміі»;
- 5 гадоў пазбаўлення права займаць пасацы, звязаныя з выкананнем арганізацыйна-распарадчых і адміністрацыйна-гаспадарчых абавязацельстваў разам з пазбаўленнем волі ў якасці дадатковага пакарання ў дачыненні да аднаго чалавека;
- прымусовае лячэнне ад хранічнага алкагалізму разам з пазбаўленнем волі і штрафам у дачыненні да аднаго чалавека.
Па вядомых праваабаронцам прысудах у сакавіку суды прымянялі пакаранне, звязанае з пазбаўленнем волі, у 58,1% выпадкаў крымінальнага асуджэння грамадзян, «хатнюю хімію» — у 38,7%, арышт — у 1,6%, штраф — у 1,6%.
Такім чынам, у сакавіку пакаранне па палітычна матываваных крымінальных справах, звязанае з пазбаўленнем волі, яе абмежаваннем у выглядзе «хатняй хіміі» і арыштам суды прымянялі ў 98,4% выпадкаў асуджэння фігурантаў палітычна матываваных крымінальных спраў.
Джэфры Эпштэйн некалькі разоў атрымліваў візу ў Беларусь. І дакладна наведваў нашую краіну7
Каментары