Абвешчаны больш за чатыры гады таму часовым кіраўніком Венесуэлы лідар апазіцыі Хуан Гуайдо пакінуў краіну. «Я толькі што прыбыў пешшу ў Калумбію, як гэта зрабілі мільёны венесуэльцаў да мяне», — напісаў Гуайдо ў твітары.
Цягам апошніх некалькіх тыдняў Гуайдо знаходзіўся «ў стане павышанай гатоўнасці», бо з'явілася інфармацыя пра тое, што ўрад Венесуэлы мае намер яго арыштаваць, паведамляе «Спутнік»
Апазіцыянер у сацсетцы таксама заявіў пра свае планы сустрэцца з міжнароднымі дэлегацыямі, якія прыбываюць у Калумбію на саміт, які адбудзецца 25 красавіка. Пры гэтым ён не ўдакладняе, ці вернецца ў Венесуэлу.
У канцы снежня мінулага года венесуэльская апазіцыя прагаласавала за ліквідацыю Часовага ўрада Гуайдо. Лідары апазіцыі растлумачылі, што структура Часовага ўрада аслабла і не выконвае сваіх задач. У выніку Гуайдо пакінуў пасаду спікера нацасамблеі — так называецца апазіцыйны парламент.
На пачатку 2019 года Венесуэлу ахапілі масавыя пратэсты — гэта адбылося пасля прывядзення да прысягі прэзідэнта Нікаласа Мадуры. Хуан Гуайдо, кіраўнік Нацыянальнай асамблеі, тады абвясціў сябе часовым кіраўніком дзяржавы. У гэтай якасці яго прызнаў шэраг краін Захаду, у тым ліку ЗША.
Цяпер чытаюць
Вось хто той хлопец, які паехаў на праполку бульбы і стаў героем сацсетак5
Каментары