«Міна, я сумую па табе». Златан Ібрагімавіч апублікаваў кранальны допіс
Шведскі форвард Златан Ібрагімавіч, які на мінулым тыдні заявіў, што заканчвае кар'еру, падвёў у інстаграме вынікі свайго футбольнага жыцця.
![](http://nashaniva.com/img/w732d4webp1/photos/z_2023_06/zlatan_ap230617-6yaa3.jpg.webp)
«Я нарадзіўся ў Мальмё. Вырас у Амстэрдаме. Стаў мудрэйшым у Турыне. Я стаў ільвом у Барселоне. Вырас у Мілане і здабыў новыя перспектывы ў Парыжы. Набраўся сіл у Манчэстэры і трохі павесяліўся ў Лос-Анджэлесе. А потым, нарэшце, здабыў спакой на сваёй новай радзіме ў Мілане.
Я створаны табой. І спадчына, якую я спадзяюся пакінуць пасля сябе, — гэта ўвесь новы Златан, створаны мной. Усе тыя, у каго львінае сэрца. Усе тыя, у каго ў вачах гарыць агонь. Усе тыя, хто сапраўды разумее, што немагчымага няма. Дзякуй за ўсё.
Міна, мы зрабілі гэта! Паездка скончаная. Гэта было дзіўнае падарожжа. Я сумую па табе», — напісаў Златан.
Міна — гэта футбольны агент Міна Раёла, які спрычыніўся да развіцця кар'еры Ібрагімавіча. Ён памёр 30 красавіка 2022 года.
Ібрагімавіч за час футбольнай кар'еры забіў 511 галоў у 639 матчах за такія клубы, як «Мальмё», «Аякс», «Ювентус», «Пары Сен-Жэрмен», «Манчэстэр Юнайтэд», «Барселона», «Мілан», «Інтэр», «Лос-Анджэлес Гэлаксі», ён выйграў чэмпіёнскія тытулы ў чатырох краінах: «Аякс» (Нідэрланды), «Інтэр», «Мілан», «Ювентус», «Мілан» (Італія), «Барселона» (Іспанія), ПСЖ (Францыя).
Форвард таксама ёсць найлепшым бамбардзірам зборнай Швецыі з 62 галамі ў 121 матчы.
Каментары