Рэзервы на фронце яшчэ не задзейнічаныя, і ёсць поспехі, якія пакуль не выдаюць — Рэзнікаў
Міністр абароны Украіны адхіляе сумневы ў поспеху летняга контрнаступу і намякае, што нядаўнія сціплыя дасягненні — толькі «прэв'ю» да значна большага наступу.
Рэзнікаў заявіў у інтэрв'ю Financial Times, што дэакупацыя групы сёл на працягу апошніх тыдняў была «не галоўнай падзеяй» у запланаваным Кіевам наступе.
«Калі гэта адбудзецца, вы ўсё ўбачыце… Усе ўбачаць усё», — сказаў ён, адмахнуўшыся ад паведамленняў медыя аб павольным прасоўванні супраць добра ўмацаваных расійскіх пазіцый.
Міністр пацвердзіў, што асноўныя вайсковыя рэзервы Украіны, уключаючы большасць брыгад, якія нядаўна прайшлі навучанне на Захадзе і якія маюць на ўзбраенні сучасныя танкі і бронемашыны NATO, яшчэ не былі задзейнічаныя ў аперацыі.
Па словах Рэзнікава, украінская армія працягвае наносіць вялікія страты расійскім войскам, іх «дэградацыя» з'яўляецца інструментам, а вызваленне ўкраінскіх зямель — мэтай.
Міністр абароны заявіў, што ўкраінскія войскі дасягнулі «пэўных поспехаў», якія Генеральны штаб не агучвае, каб не падвяргаць небяспецы войскі.
«Часам расіяне не дакладваюць свайму кіраўніцтву пра тое, што яны страцілі пэўны ўчастак або тэрыторыю. Яны баяцца дакладваць далей свайму кіраўніцтву».
Рэзнікаў папярэдзіў, што гэтая аперацыя будзе кантраставаць з леташнім разгромам расійскіх войскаў пад Кіевам, у Харкаўскай вобласці і ў Херсоне.
«Нельга чакаць цуду ў кожнай аперацыі», — сказаў ён.
FT адзначае, што ўкраінскія войскі цяпер прамацваюць лініі расійскай абароны і атакуюць у розных месцах, каб прымусіць Расію здагадвацца, дзе будзе асноўны наступ.
27 чэрвеня міністр абароны Вялікабрытаніі Бен Уолес паведаміў, што ў выніку контрнаступу Украіна адваявала ў Расіі блізу 300 квадратных кіламетраў. Гэта ўдвая больш, чым афіцыйна абвясціў Кіеў.
Раней прэзідэнт Украіны Уладзімір Зяленскі прызнаў, што поспехі на фронце «больш павольныя, чым хацелася б». Паводле яго, увосень таксама быў момант, калі контрнаступальныя дзеянні здаваліся павольнымі, але пасля было прасоўванне наперад.
Удава актывіста Максіма Чарняўскага расказала пра яго пакуты перад суіцыдам5
Каментары