У пражскім выданні «Вясна» выйшла кніга «Марнатраўны сын: тэксты песень беларускіх рок-гуртоў 1987» музыканта Фелікса Аксёнцава, які ў 1980-1990-я быў удзельнікам беларускага гурта ULIS.
Гэта дзевятнаццатая кніга, выдадзеная гэтым незалежным выдавецтвам, якое пазіцыянуе сябе прадаўжальнікам слаўнай традыцыі беларускага кнігадрукавання ў Празе. Рэдактарам выдавецтва стаў беларускі перакладчык і журналіст Сяргей Шупа.
Фелікс Аксёнцаў, аўтар кнігі, гэтаксама ёсць аўтарам словаў да песень трох першых альбомаў гурта ULIS: «Чужаніца» (1989), «Краіна доўгай белай хмары» (1991), «Танцы на даху» (1993). Таксама ён пісаў тэксты для гуртоў «Крама» і «Бонда».
Усе яны, а таксама «некалькі неспадзяванак» увайшлі ў зборнік песень «Марнатраўны сын». У кнізе багата фотаздымкаў, а таксама QR-кодаў, з дапамогай якіх можна паслухаць альбомы.
Фелікс Аксёнцаў з’ехаў у 1996 годзе з Беларусі ў канадскі Ванкувер, дзе цягам дзесяці гадоў жыў у самаізаляцыі, прыняў дзэн-будызм. Іранічны эпіграф кнігі «А адзін дык вабшчэ ў Канадзе…», узяты з песні «Чаканне Калядаў» Міхаіла Анемпадыстава, адсылае якраз да гэтай падзеі ў жыцці творцы. Прадмову ж напісаў журналіст Ян Максімюк, удзельнік і сведка, як кажа сам музыка, «дзіўных падзей на мяжы 1980-1990-х».
Кнігу аформіў мастак Андрэй Дарохін, які раней таксама стварыў вокладкі для альбомаў гурта ULIS. Уліс — гэта латынізаваная форма імя старажытнагрэчаскага героя Адысея, які адрозніваўся розумам і хітрасцю. Якраз ягоная мармуровая постаць з верным сабакам Аргусам і наўмысным анахранізам, бас-гітарай, змешчаная на вокладцы выдання.
Фелікс Аксёнцаў на ўласнай старонцы ў фэйсбуку паабяцаў, што будзе працяг кнігі.
Каментары