Палітвязню Андрэю Сачэўку змянілі меру пакарання. Замест калоніі яго адправілі ў турму
Як стала вядома Mayday team, на мінулым тыдні адбыўся судовы працэс па пераводзе палітвязня з Гродна на турэмны рэжым. Найверагодней, далейшае пакаранне ён будзе адбываць у магілёўскай турме №4.
У бабруйскай папраўчай калоніі №2, дзе адбываў свой тэрмін Сачэўка раней, на яго аказваўся вялікі ціск з боку супрацоўнікаў і адміністрацыі. Так, у пачатку жніўня мужчыну адправілі ў памяшканне камернага тыпу на два месяцы.
Да гэтага Сачэўку пратрымалі 23 сутак у штрафным ізалятары. Яшчэ тады яму заявілі, што на яго будуць ціснуць праз ягоныя «няправільныя погляды».
У ШІЗА палітвязень трапіў за тое, што адмовіўся выносіць смецце (такім чынам адміністрацыя калоніі спрабавала «панізіць статус» палітвязня).
Андрэй Сачэўка быў асуджаны нібыта за «заклікі да беспарадкаў» (арт.293 КК РБ) і «распальванне сацыяльнай варожасці» (арт. 130 КК РБ) за каментары ў адным з тэлеграм-каналаў Гродна. Вядома, што напісаў іх Андрэй у ноч з 11 на 12 жніўня 2020 года, калі ішлі жорсткія разгоны пратэстоўцаў.
Абласны суд Гродна пакараў маладога чалавека 6 гадамі пазбаўлення волі. Акрамя таго, палітвязень быў уключаны ў спіс асоб, «датычных да тэрарыстычнай дзейнасці».
Хто з палітвязняў выйшаў на свабоду 16 верасня ПОЎНЫ СПІС23
Каментары