У Віцебску затрымалі казачага атамана. Ён значны дэвелапер, КДК мае да яго прэтэнзіі
Буйнога віцебскага дэвелапера затрымалі праз падазрэнне ва ўхіленні ад выплаты падаткаў, паведамляе прэс-служба Камітэта дзяржкантролю. КДК недалічыўся ад яго 2,5 млн рублёў падаткаў. «Наша Ніва» мяркуе, што гаворка ідзе пра віцебскага бізнэсмена Васіля Раманенку. Ён таксама быў атаманам Віцебскай акругі.
Як паведамляе КДК, падазраваны восем гадоў займаўся арэндай камерцыйнай нерухомасці. Ва ўласнасці яго сямʼі знаходзіцца больш за 65 аб’ектаў, у тым ліку буйны гандлёвы цэнтр, адзін з рынкаў горада, складскія памяшканні.
Паводле КДК, з мэтай ухілення ад падаткаў «галава сямейства, зарэгістраваны ў якасці індывідуальнага прадпрымальніка, арганізаваў рэгістрацыю яшчэ шасці ўзаемазалежных і падкантрольных суб’ектаў гаспадарання, якія займаліся тым самым відам дзейнасці, пры гэтым выкарыстоўвалі спецыяльны рэжым падаткаабкладання».
КДК мяркуе, што паміж гэтымі суб’ектамі гаспадарання бізнэсовец штучна размеркаваў гандлёвыя аб’екты і выручку ад іх здачы ў арэнду.
«Фінансавай міліцыяй быў высветлены цэлы шэраг прыкмет, якія паказваюць на наяўнасць супрацьпраўнай схемы мінімізацыі падаткаў: кампаніі вялі супольны бізнэс, кіраванне іх дзейнасцю фактычна ажыццяўлялася адной асобай, офісныя памяшканні ўсіх суб’ектаў гаспадарання знаходзіліся на адным юрыдычным адрасе ды іншае», — паведамляе ведамства.
Па версіі КДК, у выніку неабгрунтаванага выкарыстання льготнага рэжыму падаткаабкладання бізнэсовец ухіліўся ад выплаты падаткаў на агульную суму не меншую за 2,5 млн рублёў.
У дачыненні да яго і яшчэ чатырох чалавек распачатая крымінальная справа.
Праведзеныя восем ператрусаў, арыштаваныя 65 аб’ектаў нерухомасці агульным коштам каля 100 млн рублёў.
«У цяперашні час падазраваныя па крымінальнай справе даюць прызнальныя паказанні. Прымаюцца меры па кампенсацыі нанесенай шкоды. У добраахвотным парадку імі пералічана ў бюджэт 330 тысяч рублёў», — дадалі ў КДК.
Інфармацыю пра затрыманне Раманенкі з'явіліся ў сетках 27 жніўня. Напэўна, Раманенка цяпер на волі, але дакладнай інфармацыі на гэты конт няма.
Яго сям'я валодае рынкам «Цэнтральны», будаўнічай крамай «РамГандаль», былым кінатэатрам «Брыганціна» і г. д.
Раманенку 71 год. Ён скончыў Акадэмію сельскай гаспадаркі ў горадзе Горкі ў 1984 годзе, працаваў у кіроўных органах сельскай гаспадаркі. «Наладзіў у горадзе пастаўкі прадуктаў харчавання для насельніцтва», як піша пра яго сайт «Беларускае казацтва».
Цікавасць да яго гэтага сайта не выпадковая. Ëн быў галоўным атаманам Віцебскай акругі гэтай структуры з расійскімі каранямі.
Удава актывіста Максіма Чарняўскага расказала пра яго пакуты перад суіцыдам5
Каментары