Беларусам прапаноўваюць ляцець загараць зімой у Кітай. Кірунак называюць самым даступным
Беларускія турфірмы пачалі піярыць новы варыянт адносна таннага пляжнага адпачынку на зімовы перыяд — кітайскі востраў Хайнань. Цэны — ад 700 даляраў на чалавека.
Каб наведаць Хайнань, віза беларусам не патрэбна. Бязвізавы тэрмін знаходжання — 30 дзён. На працягу года можна тройчы без візы наведаць Кітай.
Хайнань знаходзіцца на адной шыраце з Гаваямі, таму ў рэкламе востраў часта называюць «Усходнія Гаваі». Там трапічны клімат, за год бывае 300 сонечных дзён, а купацца можна ў любы час. Вылучаюць сезон дажджоў (пік ападкаў прыпадае на перыяд са жніўня па кастрычнік) і сухі сезон (са снежня па сакавік). Востраў таксама лічыцца адным з унікальных месцаў планеты з-за вельмі чыстага паветра.
Найбольш папулярны горад-курорт — гэта Санья. Як пішуць тураператары, тут адначасова спалучаюцца высокія тэхналогіі і прыгажосць прыроды. Абяцаюць маляўнічыя пейзажы, падземныя тэрмальныя крыніцы, чысты пясок і старажытныя вулканы. Побач ёсць таксама курорты Дадунхай (яго любяць рускія турысты), Хайтанг Бей і Ялонг Бей (самы дарагі і элітны).
З цікавага: многія кітайцы пазбягаюць загару, бо і дагэтуль ён для іх лічыцца прыкметай нізкага саслоўя. Таму на пляжы яны часта знаходзяцца ў адзенні, а ў продажы можна знайсці нават спецыяльныя маскі для абароны твару ад уздзеяння ўльтрафіялету.
Усяго ў сарака кіламетрах ад Саньі, каля гары Наньшань (перакладаецца як Паўднёвая Гара), знаходзіцца аднайменная міжнародная зона турызму. Там размяшчаюцца манастыр і парк Багіні Гуаньінь. У адным з храмаў знаходзіцца статуя Гуаньінь, зробленая з чыстага золата. Яна важыць 140 кілаграмаў і занесена ў Кнігу рэкордаў Гінеса як самая вялікая залатая статуя ў Азіі.
Китай стеклянный мост ✌
У тыктоку можна пабачыць шмат відэа са шклянога маста ў парку Ялонг Бэй (ён знаходзіцца ў горадзе Санья). Празрыстая канструкцыя, якая ўражвае турыстаў, пабудавана са звыштрывалага шкла таўшчынёй 30 міліметраў. Працягласць маста складае 400 метраў, а самае яго высокае месца знаходзіцца на вышыні 450 метраў над узроўнем мора. Перад тым, як выйсці на гэты цуд інжынернай думкі, абавязкова адзяваць на ногі бахілы, каб не падрапаць і не запэцкаць шкло.
Яшчэ сярод мясцовых цікавостак адзначаюць парк малпаў, дабірацца ў які трэба па самай доўгай у свеце надводнай канатнай дарозе. У парку жыве каля дзвюх тысяч прыматаў (у асноўным гэта гуанскія макакі).
Калі паглядзець водгукі турыстаў на Хайнань, то можна пабачыць, што людзей акрамя пляжнага адпачынку цікавіць легендарная кітайская медыцына, дайвінг, а таксама шопінг (дарэчы, тут займаюцца здабычай натуральнага жэмчугу). Сярод такога, што не ўсім падабаецца — спецыфічная нацыянальная ежа.
Але ж самым вялікім мінусам водпуску на Хайнані тураператары называюць доўгі шлях да адпачынку. Згодна з данымі сэрвісу пошуку квіткоў «Авіасэйлс», самы хуткі пералёт з Масквы ў аэрапорт горада Санья доўжыцца 13 гадзін (ёсць перасадка ў Пекіне, якая займае як мінімум паўтары гадзіны). Але ёсць шмат варыянтаў (асабліва сярод бюджэтных), пры якіх пералёт у адзін бок займае адзін-два дні.
«Наша Ніва» звярнулася ў адну з беларускіх турфірмаў, якая прапаноўвае туры ў Кітаі. Высветлілася, што забраніраваць адпачынак на Хайнані ў снежні-студзені можна зыходзячы з бюджэту ад 700 даляраў на чалавека. У гэты кошт уваходзіць пералёт з Масквы, 10 начэй пражывання ў чатырохзоркавым гатэлі і сняданкі.
Тураператар сумленна папярэджвае, што пры такім кошце стыкоўкі пры пералёце хутчэй за ўсё будуць доўгія — ад 8 да 24 гадзін. За хутчэйшы варыянт прапануюць даплаціць 250 даляраў за пару.
У Маскву можна дабірацца самастойна або даплаціць за трансфер у аэрапорт і назад — каштуе гэта 280 беларускіх рублёў з чалавека.
Здаюць у арэнду катэдж загінулага хакеіста Цыплакова. Вось інтэр'еры ФОТЫ14
Каментары