«Табе да дома 440 кіламетраў». Таксіст распавёў пра кліента з Гомеля, які не разумеў, як апынуўся ў Полацку
Доўгія выхадныя для многіх становяцца нагодай добра выпіць. Пра адзін з кур’ёзных выпадкаў распавёў у тыктоку хлопец, які працуе таксістам у Полацку.
Таксіст расказаў, як адпрацаваў змену ў «Яндэкс.таксі», на якую прыйшлася ноч з пятніцы на суботу — гэта быў якраз пачатак доўгіх лістападаўскіх выходных. Хлопец адзначыў, што нецвярозых кліентаў было шмат. Таму калі ён прыехаў па чарговым адрасе і пабачыў добра апранутага маладога чалавека, то быў вельмі рады — нарэшце нармальная замова. Але радасць была нядоўгай: кліент літаральна лёг у аўто, а ў салоне з’явіўся ўстойлівы пах алкаголю.
— Раптам я ў люстэрка бачу, што ззаду ззяюць вочы, у якіх няма жыцця. Кліент кажа: «Мы ж на Сельмаш едзем?». Я адказваю: «Здаецца, не». «У цябе адрас — Якуба Коласа?» — «Так». — «Ну значыць на Сельмаш» — «Няма там аніякага Сельмашу, аб чым ты гаворыш увогуле?!»
Кліент шчыра абурыўся тым, што таксіст працуе ў Гомелі, але нічога не ведае пра горад. Але быў нюанс: гісторыя адбывалася зусім у іншым месцы — у Полацку. Гэта інфармацыя дапамагла пасажыру раптам стаць цвярозым. Згадаць, як жа яго занесла так далёка ад дому, хлопец не мог.
Таксіст патлумачыў:
— Ты ў Полацку, табе да дома 440 кіламетраў, пяць з паловай гадзін язды. Да Гомеля 600 рублёў — і мы там, няма пытанняў.
Пасажыр вырашыў, што гэта занадта дорага, і таксіст адвёз яго на вакзал. Цяпер таксіст спадзяваецца, што хлопец дабраўся да дому і з ім усё добра.
Відэа завірусілася ў тыктоку — яно сабрала амаль 665 тысяч праглядаў. Сярод каментатараў знайшліся і тыя, хто трапляў у аналагічныя сітуацыі:
«Я так аднойчы ў Мазыры апынуўся. Добра, што сам я са Жлобіна», «Я аднойчы выйшаў з дому за цыгарэтамі ў Гродне… Праз двое сутак у Смаленску прачнуўся», «Ён як я пагуляў: я з гомельскага Сельмаша ў Мінску апынуўся».
Па афіцыйнай статыстыцы, спажыванне алкаголю на душу насельніцтва (ва ўзросце 15 гадоў і старэй) у Беларусі складае 10,8 літра. Апошнія гады гэта лічба крыху зніжаецца, але спажыванне алкаголю ў краіне ўсё яшчэ істотна перавышае рэкамендацыі Сусветнай арганізацыі аховы здароўя (да 8 літраў на душу насельніцтва за год). Акрамя таго, Беларусь застаецца ў лідарах па спажыванні моцнага алкаголю — 6 літраў на чалавека.
Цяпер чытаюць
Як асабістая доктарка Лукашэнкі вучыць беларусаў цаніць радзіму, а сама скупляе люкс і адпачывае на Блакітным Беразе ШМАТ ФОТА58
Як асабістая доктарка Лукашэнкі вучыць беларусаў цаніць радзіму, а сама скупляе люкс і адпачывае на Блакітным Беразе ШМАТ ФОТА
На Афоне адшукалі тры невядомыя раней асобнікі Астрожскай Бібліі. Для яе стварэння друкар Іван Фёдараў, выхадзец з Беларусі, выкарыстоўваў тэксты Скарыны55
Каментары