У Мінску за «здраду дзяржаве» і «экстрэмізм» пачалі судзіць трох мытнікаў
Мінскі гарадскі суд пачаў разглядаць справу ў дачыненні да трох чалавек, якіх абвінавачваюць паводле дзевяці артыкулаў Крымінальнага кодэкса — у тым ліку ў «здрадзе дзяржаве» і «экстрэмізме».
Яўген Гурыновіч, Уладзімір Журомскі і Віктар Новік. Калаж: Zerkalo.io
Разгляд справы ў дачыненні да Яўгена Гурыновіча, Уладзіміра Журомскага і Віктара Новіка пачаўся 5 студзеня ў закрытым рэжыме. Трое мужчын працавалі мытнікамі, паведамляе dissidentby.
Падрабязнасці абвінавачвання невядомыя, але судзяць мужчын па дзевяці артыкулах Крымінальнага кодэкса:
- ч. 2 арт. 426 — перавышэнне ўлады або службовых паўнамоцтваў;
- ч. 2 арт. 377 — крадзеж, знішчэнне, пашкоджанне альбо ўтойванне дакументаў, штампаў, пячатак, крадзеж бланкаў;
- ч. 1 арт. 356 — здрада дзяржаве (у рэдакцыі закона ад 09.01.2019);
- ч. 1 арт. 179 — незаконны збор альбо распаўсюд інфармацыі аб прыватным жыцці (выключана 26.05.2021);
- ч. 2 арт. 352 — неправамернае завалоданне камп'ютарнай інфармацыяй;
- ч. 2 арт. 361-4 — садзейнічанне экстрэмісцкай дзейнасці;
- ч. 1, 2 арт. 203-1 — незаконныя дзеянні ў дачыненні да інфармацыі аб прыватным жыцці і персанальных дадзеных;
- ч. 3 арт. 361-1 — стварэнне экстрэмісцкага фарміравання альбо ўдзел у ім;
- ч. 2, 3 арт. 130 — распальванне расавай, нацыянальнай, рэлігійнай альбо іншай сацыяльнай варожасці або варожасці.
Судзіць былых мытнікаў Сяргей Хрыпач, вядомы шматлікімі палітычна матываванымі прысудамі.
Каментары