Школа польскай мовы PanProfesor спыніла працу пасля візіту сілавікоў
На фэйсбук-старонцы школы польскай мовы PanProfesor з'явіўся пост, у якім яе кіраўніцтва падрабязна расказала, што адбылося ў іх 21 снежня мінулага года і чаму школа вымушана спыніць працу.
Паводле паведамлення, два тыдні таму прадстаўнікі нейкіх спецыяльных службаў «прыйшлі ў госці» да аднаго з супрацоўнікаў у Мінску, а пасля правялі ператрус у офісе.
Як пазней аказалася, у тую раніцу 21 снежня 2023 года школа PanProfesor была не адзінай, якой давялося перажыць падобнае: на некалькіх іншых курсах польскай мовы тады былі затрыманыя дырэктары, супрацоўнікі і выкладчыкі, некаторых з іх прымусілі запісаць відэа.
Практычна з парога «таварышы» сталі заяўляць, што ў кампаніі шмат парушэнняў і даўгоў, а таксама што на іх, маўляў, паступіла нейкая ананімная заява, пра змест якой не казалі.
А калі адзін з іх пабачыў статут і іншыя асноўныя дакументы прадпрыемства, то сказаў, што, маўляў, «вас толькі за гэта ўсіх можна пасадзіць надоўга».
Пасля таго школе было настойліва прапанавана неадкладна:
1) спыніць рэкламу;
2) закрыць офіс і спыніць заняткі;
3) самастойна ліквідаваць кампанію.
Паколькі «ў нас няма ніякіх рэсурсаў і магчымасцяў хоць бы нейкім чынам супраціўляцца падобнаму, а таксама «часам не да законаў», кіраўніцтва школы прыняло балючае для яго рашэнне аб закрыцці беларускай кампаніі, супрацоўнікі звольненыя.
«Для прадстаўнікоў спецслужбаў і іншых азвяронкаў гэтая навіна можа быць алеем на сэрцы, для нас жа — завяршэннем амаль 9-гадовай працы ў Беларусі пад брэндам PanProfesor, хоць многія з нашых выкладчыкаў маюць 10, 15 і нават 20-гадовы стаж выкладання польскай мовы», — канстатуецца ў паведамленні.
«Мы яшчэ не памерлі, але наша дзіця ў Беларусі робіць апошнія ўздыхі.
Спрабуючы заставацца вернымі перш за ўсё самім сабе, мы прынялі рашэнне як мінімум завяршыць групы, якія не давучыліся, анлайн. Дзякуй нашым вучням, большасць падтрымала нашу прапанову», — абяцаюць педагогі.
А паколькі за завяршэнне навучання адказвае партнёрская кампанія PanProfesor з Польшчы, то яны гарантуюць, што «ніякай уцечкі даных у гэтай сувязі не будзе, а абавязацельствы па навучанні будуць выкананыя ў адпаведнасці з дамовай».
«Яны патрабуюць спісы ўсіх кліентаў». Дырэктар польскіх курсаў, куды тыдзень таму прыйшлі сілавікі, расказаў пра складаны маральны выбар
ГУБАЗіК наведаў школу польскай мовы. Падобна, што затрыманы яе дырэктар Вадзім Свістуноў
«Дэманстравала карціну з БЧБ-сцягам». Стала вядома, за што арыштавалі мастачку Ганну Крук
У Беларусі, як і ў мінулым годзе, на пераднавагоднія хвіліны адключылі ютуб19
Каментары