Лукашэнка заявіў, што дэмсілы нібыта вядуць перамовы, каб Беларусі аддалі Пскоў і Смаленск у выпадку паразы Расіі
А ўзамен — захад Беларусі аддаць Польшчы.
Лукашэнка пужаў прысутных на нарадзе магчымым перадзелам Беларусі. Ён заявіў, што хтосьці з дэмсілаў нібыта абяцае Польшчы Заходнюю Беларусь.
«Польшча мае права на заходнія землі Беларусі. А ў выпадку паразы Расіі Беларусь будзе прырастаць за кошт заходніх зямель Расіі», — прывёў Лукашэнка нібыта нечыю цытату.
«Чытай, нам прырэжуць нешта са Смаленскай, Бранскай, можа быць, Пскоўскай абласцей. А Заходнюю Беларусь мы павінны (да Мінска, як вы ведаеце, мяжа была) аддаць Польшчы. Гэта новыя «дэмакратычныя ўлады вядуць перамовы» на Захадзе».
Ён дадаў, што не можа з гэтым пагадзіцца.
Насамрэч і апазіцыя не вядзе такіх перамоваў, і Украіна, і Польшча змагаюцца за захаванне існуючых межаў у Еўропе, тады як Расія і Лукашэнка наадварот спрабавалі ажыццявіць новы перадзел Еўропы.
Каментары