У Магілёве ў базу «дармаедаў» уключылі мужчыну з непрацоўнай групай інваліднасці
Другая група інваліднасці ў Беларусі непрацоўная, але магілёўскія ўлады ўсё адно ўключылі ў базу «дармаедаў» яе ўладальніка Сяргея Гіркіна, паведамляюць праваабаронцы з Mayday.team.
Сяргей Гіркін выклаў у сацсеткі сваю новую «жыроўку», у якой «камуналка» налічаная паводле «тарыфаў, якія забяспечваюць поўную кампенсацыю эканамічна абгрунтаваных выдаткаў». Мужчына лічыць, што прычына занясення ў базу «дармаедаў» — ягоны ад’езд з Беларусі. Магілёвец ужо пяць гадоў жыве ў Польшчы і не атрымлівае беларускай дапамогі па інваліднасці.
Бестэрміновую другую групу інваліднасці праз дзіцячы цэрэбральны параліч Сяргей мае з 1993 года. Мужчына — ветэран дэмакратычнага руху Магілёва, ён быў пастаянным удзельнікам пратэставых акцыяў апазіцыі з пачатку 1990-х гадоў. Сяргея шмат разоў затрымлівалі і штрафавалі.
Каментары