За апошні год як мінімум 38 расійскіх кіраваных авіябомбаў упалі ў Белгарадскай вобласці Расіі. Пра гэта піша The Washington Post са спасылкай на ўнутраны дакумент мясцовых уладаў, які быў перахоплены ўкраінскай разведкай.
Дакумент змяшчае табліцу з інфармацыяй пра інцыдэнты, размініраванні і эвакуацыі грамадзян.
Даныя ахопліваюць перыяд з красавіка 2023 года па красавік 2024-га. Гаворка ідзе пра цяжкія кіраваныя бомбы савецкай вытворчасці з сістэмай навядзення, якая, на думку экспертаў, часта выходзіць з ладу. Гэта і прыводзіць да падзення бомбаў на тэрыторыі Расіі.
Большасць бомбаў знайшлі цывільныя асобы: фермеры, леснікі і мясцовыя жыхары. У большасці выпадкаў Мінабароны Расіі не змагло адказаць, калі былі запушчаныя бомбы. Гэта сведчыць пра тое, што знойдзеныя боепрыпасы маглі праляжаць на зямлі некалькі дзён.
Як мінімум чатыры бомбы ўпалі на сам Белгарад, яшчэ сем былі выяўленыя ў найбліжэйшых прыгарадах. Больш за ўсё, 11 бомбаў, упала ў памежным Грайваранскім раёне, дзе некаторыя не ўдалося знайсці з-за «складанай аператыўнай абстаноўкі».
Ужо ў маі-чэрвені ў Белгарадскай вобласці было зафіксавана яшчэ некалькі выбухаў, як мяркуецца, звязаных з падзеннем расійскіх бомбаў ФАБ-500.
Еўрапейцы гатовыя пагадзіцца на адпраўку сваіх войскаў для аховы беларуска-ўкраінскай мяжы — вялікае апытанне1
Каментары