Зяленскі: Калі Байдэн не падтрымае План перамогі Украіны, мы атрымаем вельмі доўгую вайну
Прэзідэнт Украіны Уладзімір Зяленскі ў інтэрв'ю амерыканскаму выданню The New Yorker адзначыў, што План перамогі, які мае Украіна, распрацаваны з улікам падтрымкі прэзідэнта ЗША Джо Байдэна.
Калі прэзідэнт ЗША яго не падтрымае, Украіна працягне жыць па плане Б (цяперашнім).
«Гэта азначала б, што Байдэн не хоча скончыць вайну спосабам, які пазбаўляе Расію перамогі. І мы б атрымалі вельмі доўгую вайну — немагчымую, знясільваючую сітуацыю, якая прывядзе да гібелі велізарнай колькасці людзей.
Сказаўшы гэта, я не магу ні ў чым вінаваціць Байдэна. Урэшце, ён зрабіў магутны, гістарычны крок, калі вырашыў падтрымаць нас у пачатку вайны, што падштурхнула іншых нашых партнёраў зрабіць тое ж самае. Мы прызнаем вялікае дасягненне Байдэна ў гэтых адносінах. Гэты яго крок ужо быў гістарычнай перамогай».
Зяленскі заўважыў, што прымусіць Пуціна сесці за стол перамоваў можа моцная Украіна. «Проста раней я толькі казаў пра гэта, а цяпер выклаў усё гэта на паперы, з канкрэтнымі аргументамі і канкрэтнымі крокамі, якія ўзмоцняць Украіну на працягу кастрычніка, лістапада і снежня і зробяць магчымым дыпламатычнае завяршэнне вайны.
Розніца на гэты раз будзе заключацца ў тым, што Пуцін зразумее глыбіню гэтага плана і адданасць нашых партнёраў нашаму ўмацаванню, а таксама ўсвядоміць важны факт: калі ён не гатовы скончыць гэтую вайну сумленным і справядлівым спосабам, а замест гэтага жадае працягваць спробы знішчыць нас, то моцная Украіна не дазволіць яму гэтага зрабіць. Мала таго, працяг пераследу гэтай мэты таксама значна аслабіць Расію, што паставіць пад пагрозу ўласную пазіцыю Пуціна».
Як піша Bloomberg, гэты план прадугледжвае запрашэнне Украіны ўступіць у NATO, а ЗША па ім абавязуецца стала пастаўляць сучаснае ўзбраенне.
Падрабязную версію Плана перамогі Зяленскі збіраецца прадставіць Байдэну падчас іх сустрэчы ў Вашынгтоне 26 верасня.
Каментары
Ў іншую чыю кадэнцыю я б не наважыўся, бажуся Дзяржынскім!