Завершаны асноўныя следчыя дзеянні па крымінальнай справе аб двух тэрактах, учыненых на расійскім БАМе беларусам нібыта па заданні СБУ. Мужчына, якому інкрымінуецца ўстаноўка магнітных мін на чыгуначныя саставы з палівам, цалкам прызнаў віну, назваўшы арганізатарам злачынства яшчэ аднаго беларуса, які пражывае ў Літве, піша «Камерсант».
Басманны райсуд падоўжыў да года тэрмін утрымання ў СІЗА грамадзяніна Беларусі Сяргея Ерамеева, які пражываў у апошнія гады ў Расіі і займаўся дробным бізнэсам. 53-гадовы Ерамееў абвінавачваецца ў здзяйсненні двух злачынстваў, прадугледжаных п. «а», «в» ч. 2 арт. 205 (тэракты, учыненыя па папярэдняй змове або арганізаванай групай і якія прывялі да прычынення значнай маёмаснай шкоды) КК.
Гаворка ідзе пра выбухі 29 і 30 лістапада 2023 года на чыгуначных саставах з нафтапрадуктамі, якія рухаліся з Тайшэта ў Тынду і Нерюнгры па Байкала-Амурскай магістралі і прывялі да ўзгарання цыстэрнаў з саляркай.
Супрацоўнікі ФСБ затрымалі Ерамеева ў Омску ў снежні мінулага года.
Фігурант прызнаў сваю віну і пачаў супрацоўнічаць са следствам, што дазволіла ГСУ СКР усталяваць, што раней Ерамееў працаваў на «Нафтане» ў Наваполацку, адкуль яго звольнілі ў 2020 годзе за ўдзел у пратэстах.
А ў 2023 годзе з Ерамеевым звязаўся іншы грамадзянін Беларусі Аляксей Сакалоў, які абвінавачваецца на радзіме ў дзяржаўнай здрадзе, і пражывае то ў Літве, то ў Польшчы. Апошні паведаміў, што супрацоўнічае з СБУ, прапанаваўшы Ерамееву зладзіць акцыі ў Расіі.
Паводле дасланых з-за мяжы каардынатаў Ерамееў, згодна з яго ж паказаннямі, знайшоў гараж у Наваполацку, у якім абсталяваў схованку. Адтуль абраў восем магнітных мін і аванс у $4 тыс.
Затым ён на машыне адправіўся ў Бурацію, дзе замініраваў і падарваў два саставы, атрымаўшы за гэта на банкаўскую карту эквівалент у рублях яшчэ $2 тыс.
Пры арышце ў судзе Омска Ерамееў заявіў, што праз «БАМ вязуць боепрыпасы (на вайну) і ён хацеў перашкодзіць руху цягнікоў.
У наступным яго адправілі ў Маскву, дзе падаўжэнне арышту практычна не абскарджвалася. Улічваючы супрацоўніцтва фігуранта, яго абарона толькі прасіла прызначыць менш строгі рэжым, замяніўшы ўтрыманне ў камеры хатнім арыштам, але ў гэтым было адмоўлена.
Мяркуецца, што ўжо пасля Новага года Ерамееў і яго абарона пачнуць азнаямленне з матэрыяламі крымінальнай справы, якая па сутнасці разгледзіць другі ўсходні Акруговы ваенны суд. Справа ж у дачыненні да Сакалова будзе расследавацца далей.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд33
Каментары