Курс даляра ЗША і еўра хутка зраўняюцца. «Наша Ніва» спытала ў эканаміста, чаму так адбываецца і як гэта адаб'ецца на беларусах.
Тры асноўныя фактары
Мінулы раз падобная сітуацыя была ўвосень 2022 года. Тады еўра каштаваў нават танней за даляр. А ў 2008-м, калі амерыканская эканоміка пакутавала ад крызісу, за 1 еўра на піку давалі $1,58.
Папярэдняе падзенне курсу еўрапейскай валюты было ў першую чаргу абумоўлена вайной ва Украіне і яе ўплывам на эканоміку Еўропы. Выраслі цэны на энерганосьбіты, што аказалася шокам для еўразоны і Еўропы агулам. Плюс наклаліся наступствы кавіду і мяккая эканамічная палітыка, якая праводзілася ў той час, тлумачыць эксперт BEROC Анастасія Лузгіна.
Цяпер жа дзейнічаюць іншыя фактары. Адной з асноўных прычын умацавання даляра эксперт называе перамогу Дональда Трампа на выбарах у ЗША.
«Трамп вядомы сваёй пазіцыяй па абароне ўнутранага рынку. Ён збіраецца перагледзець тарыфную палітыку ў дачыненні да імпарту перш за ўсё з Кітая, Мексікі і Канады. Аднак ёсць рызыкі, што новаўвядзенні закрануць і шэраг некаторых еўрапейскіх тавараў. Напрыклад, у гэтым плане вельмі нервуюцца еўрапейскія аўтавытворцы», — звяртае ўвагу эканаміст.
Падобныя рызыкі і нявызначанасці ўплываюць на кошт еўрапейскай валюты.
Эканоміка ЗША ў лепшым становішчы
Другой прычынай эксперт называе розніцу ў стане эканомік ЗША і ЕС.
«Амерыканская эканоміка дэманструе вялікую ўстойлівасць, яна была ў меншай ступені падвергнута негатыўным наступствам ад вайны ва Украіне.
Цяпер Штаты дэманструюць больш высокія тэмпы эканамічнага росту ў параўнанні з Еўропай і, хутчэй за ўсё, у 2025 годзе такая тэндэнцыя працягнецца», — мяркуе эканаміст, паказваючы ў тым ліку на больш высокую прадукцыйнасць працы ў Штатах.
Устойлівасць эканомікі ЗША прыцягвае больш інвестараў, чым найбуйнейшыя эканомікі ЕС, што таксама прыводзіць да ўмацавання даляра.
Інвестары больш глядзяць у бок ЗША, а не ЕС
Трэцім фактарам эксперт называе вынікі манетарнай палітыкі, якая праводзіцца ў ЕС і ЗША.
Чакаецца, што стаўкі будуць зніжаць і там, і там, але ў Еўропе гэта будзе адбывацца актыўней. Адпаведна, інвеставаць у амерыканскія актывы будзе выгадней, чым у еўрапейскія.
Такую сітуацыю Лузгіна тлумачыць слабым эканамічным ростам у краінах еўразоны, асабліва ў такіх буйных эканоміках, як Германія і Францыя.
«Яны дэманструюць вельмі сціплыя паказчыкі, і для стымулявання эканомік Еўрапейскаму цэнтрабанку давядзецца зніжаць стаўкі актыўней, чым гэта будуць рабіць у Штатах».
А што з гэтага беларусам?
Што тычыцца Беларусі, то, на думку эканаміста, змены курсу еўра да даляра не прынясуць для нас сур'ёзных змен.
«Кажучы пра насельніцтва, то шмат залежыць ад таго, у якой валюце людзі захоўваюць зберажэнні. У Беларусі традыцыйна найбольшай папулярнасцю карыстаецца даляр, які якраз умацоўваецца».
У той жа час слабы еўра не выгадны беларусам, якія працуюць у Еўропе і атрымліваюць зарплату ў гэтай валюце. Напрыклад, калі той жа дальнабойшчык або іншы працоўны мігрант з Беларусі ў Еўрасаюзе атрымлівае зарплату ў еўра і вырашае купіць кватэру ў Мінску, цана на якую традыцыйна будзе прывязаная да даляра.
Цяпер чытаюць
Чацвёртую лінію мінскага метро павядуць у Дражню. А «Сляпянка» і «Даўгабродская» змянілі сваё месца3
Каментары