Маладую мінчанку, якая займалася альтэрнатыўнай медыцынай, асудзілі па трох палітычных артыкулах. Імаверная прычына — каментары ў тэлеграме
Суд над Карынай Маліноўскай скончыўся 24 лютага 2025 года, але інфармацыя пра яе асобу стала вядомая толькі цяпер. Дзяўчыне магло пагражаць да 12 гадоў калоніі. Дома яе чакаюць двое дзяцей.
Карыне Маліноўскай 32 гады. Яна родам з Барысава. У ёй двое непаўналетніх дзяцей.
Пасля школы Карына пераехала з Барысава ў Мінск, каб вучыцца на цырульніцу ў прафесійна-тэхнічным ліцэі №4. Мяркуючы па сацсетках, яна завочна вучылася ў жаночым інстытуце «Энвіла», а пасля яго ліквідацыі ў 2012 годзе — на гуманітарна-эканамічным факультэце Гомельскага дзяржаўнага тэхнічнага ўніверсітэта.
Маліноўская шмат у чым сябе спрабавала — працавала цырульніцай, цікавілася псіхалогіяй, з 2018 па 2022 рабіла ўласны бізнэс па продажы святлодыёднага асвятлення.
А некалькі гадоў таму Карына захапілася тым, што яна сама называе нутрыцыялогіяй. Праўда, падобна, у рэчаіснасці гэта больш падобна да натурапатыі — альтэрнатыўнай медыцыны, якая верыць, што лячыцца лепш натуральнымі сродкамі.
Апошнія запісы дзяўчыны прысвечаныя менавіта гэтаму кірунку з рэкамендацыямі розных БАДаў і расповедамі пра тое, што лепш есці, а што лепш не есці. Магчыма, на гэтым яна і зарабляла, прадаючы БАДы па сваёй рэферальнай праграме — гэта від сеткавага маркетынгу.
Карыну Маліноўскую затрымалі ў сакавіку 2024 года. Суд над ёй пачаўся восенню 2024-га і скончыўся 24 лютага 2025 года. Карыну вінавацілі па трох артыкулах — «распальванне варожасці» (ч. 1 арт. 130 КК), «удзел у пратэстах» (ч. 1 арт. 342 КК) і «заклікі да дзеянняў, накіраваных на прычыненне шкоды Беларусі» (ч. 3 арт. 361 КК).
Мы не ведаем, у чым дакладна прычына, але падазраем, што ў каментарах у тэлеграме. Справа ў тым, што ў яе быў стары акаўнт, зарэгістраваны на яе ўласны нумар, з яе асабістым фота.
Калі яна пакідала з яго каментары з першапачаткова неабароненага акаўнта, абараніцца, на жаль, фактычна немагчыма. У базах ГУБАЗіК каментары застаюцца назаўжды, нават калі іх выдаліць, і «жорстка» прывязваюцца да нумара тэлефона і асобы.
На практыцы гэта можа працаваць так — чалавека затрымліваюць за нешта адно, пасля прабіваюць па міліцэйскіх базах (ці глядзяць тэлефон) і дадаюць яму яшчэ артыкулы. Пра такія выпадкі распавядалі людзі, якія траплялі пад рэпрэсіі.
«Наша Нiва» — бастыён беларушчыны
ПАДТРЫМАЦЬЦяпер чытаюць
«А што адбываецца?» Чэргі на беларуска-расійскай мяжы цяпер не толькі на асноўным пераходзе, а нават на глухой дарозе7
«А што адбываецца?» Чэргі на беларуска-расійскай мяжы цяпер не толькі на асноўным пераходзе, а нават на глухой дарозе
Пасол Украіны па пытаннях Беларусі адказаў на дыскусію Вячоркі і крытыкаў Ціханоўскай: Ваша ўзаемная непрымальнасць адыгрывае вельмі неканструктыўную ролю5252
Каментары