Мінабароны Расіі сцвярджае, што арсенал ва Уладзімірскай вобласці ўзарваўся з-за «парушэння патрабаванняў бяспекі»
Расійскія ўлады, паведамляючы, што ва Уладзімірскай вобласці выбухнуў 51-ы арсенал Галоўнага ракетна-артылерыйскага ўпраўлення Мінабароны, не хочуць прызнаваць, што гэта вынік працы ўкраінскіх беспілотнікаў.
Дэтанацыя боепрыпасаў адбылася ў выніку ўзгарання на тэрыторыі вайсковай часці ва Уладзімірскай вобласці, заявілі ў расійскім Мінабароны.
«Для ліквідацыі ўзгарання прыцягнутыя штатныя пажарныя разлікі вайсковай часці і МНС. Паводле папярэдняй інфармацыі, пацярпелых няма, прычына ўзгарання — парушэнне патрабаванняў бяспекі пры правядзенні работ з выбуховымі матэрыяламі», — адзначылі ў міністэрстве.
Пра атаку ўкраінскіх дронаў пры гэтым Мінабароны зусім не згадва, аднак мясцовыя жыхары кажуць, што бачылі чатыры беспілотнікі. Раніцай і ў самім вайсковым ведамстве, дарэчы, паведамлялі пра знішчэнне трох украінскіх беспілотнікаў над Уладзімірскай вобласцю.
На тэрыторыі Кіржацкага раёна, дзе грымяць выбухі, аб'яўлена надзвычайнае становішча. Таксама праводзіцца эвакуацыя жыхароў двух пасёлкаў, Барсава і Мірнага, паведаміла мясцовая адміністрацыя ў сваім тэлеграм-канале.
Губернатар Уладзімірскай вобласці Аляксандр Аўдзееў пацвердзіў інфармацыю пра выбух і прыгразіў журналістам і грамадзянам штрафамі за распаўсюд звестак аб надзычайным здарэнні «да паступлення правераных афіцыйных даных».
Як піша тэлеграм-канал «Осторожно, новости», выбухі настолькі магутныя, што іх відаць у Кальчугіне (40 км ад Барсава) і падмаскоўным Электрагорску (38 км). У Кіржачы была чутная сірэна, перадае тэлеграм-канал.
У сваю чаргу, тэлеграм-канал Baza сцвярджае, што ўсяго адбылося не менш за 10-11 выбухаў.
Пры гэтым, як паведамляе тэлеграм-канал 112, некаторыя боепрыпасы пад уздзеяннем полымя са складоў узлятаюць і трапляюць у цывільныя аб'екты. Прынамсі, нібыта ёсць інфармацыя пра два падобныя выпадкі. Адна «ракета», як сцвярджаецца, упала ў горадзе Кіржач у мікрараёне Красны Кастрычнік, каля Цэнтра вольнага часу, але не выбухнула. Другая звалілася на дачны дом у садовым таварыстве «Вязьма».
У ваколіцах Барсава знаходзіцца 51-ы арсенал Галоўнага ракетна-артылерыйскага ўпраўлення Мінабароны. Ён разлічаны на захоўванне 264 тысяч тон ракет і снарадаў. Частка боепрыпасаў захоўвалася проста пад адкрытым небам, звярнуў увагу вайсковы аналітык Ян Матвееў.
Пасля маштабнага надзвычайнага здарэння на арсенале ва Ульянаўску ў 2009 годзе на 51-ы арсенал вазілі журналістаў — і паказвалі яго як узорны аб'ект, згадвае тэлеграм-канал «Можем объяснить». У 2017 годзе з'явілася крымінальная справа аб крадзяжы 650 мільёнаў расійскіх рублёў пры будаўнічых работах на гэтым аб'екце. Усяго на яго рэканструкцыю было тады выдзелена 3,7 мільярда рублёў.
Спевака з «Марафону адзінства» асудзілі за палітыку — прыгадалі каментары 2020-га. Бараніць у суд яго хадзілі сёстры Груздзевы16
Каментары