Завербаваны ГРУ аферыст. Што за літовец рассылаў у ЕС пасылкі, якія загараліся

Грамадзянін Літвы Аляксандрас Шуранавас апынуўся ў фокусе ўвагі міжнароднага расследавання — яго падазраюць ва ўдзеле ў гібрыднай аперацыі расійскай вайсковай выведкі (ГРУ) і ў саўдзеле ў фінансавых схемах, праз якія інвестары ва ўсім свеце страцілі сотні мільёнаў еўраў, піша «Волна». 

Улетку 2024 года Шуранавас пад чужым імем адправіў чатыры пасылкі з запальнічымі прыладамі праз DHL з Вільні ў Германію, Польшчу і Вялікабрытанію. Адна з іх загарэлася проста ў аэрапорце Лейпцыга, яшчэ дзве — у лагістычных цэнтрах пад Варшавай і ў Бірмінгеме. Чацвёртая была перахопленая польскай службай унутранай бяспекі.

Пракуратуры Літвы і Польшчы афіцыйна заяўляюць: атака была арганізаваная ГРУ.

Паводле звестак Міжнароднай групы журналістаў-расследавальнікаў, раней Шуранавас узначальваў польскую кампанію Recyclix — фіктыўнае прадпрыемства, якое абяцала прыбытак ад перапрацоўкі пластыкавых адкідаў. Кампанія дзейнічала як фінансавая піраміда, у якую ўклаліся дзясяткі тысяч інвестараў. З гэтай схемай звязаны грамадзяне Расіі, Латвіі і Украіны, якія дзейнічалі пад выдуманымі імёнамі.

Агульная шкода ад афёры ацэньваецца больш чым у 39 млн еўра.

Пасля краху Recyclix тая ж група стаяла за стварэннем праекта Juicy Fields — яшчэ адной піраміды, якая нібыта інвестуе ў вырошчванне медыцынскай марыхуаны. Інвестары страцілі больш 645 млн еўра.

Шуранавас, паводле расследавання, мог быць падстаўной асобай, выкарыстанай арганізатарамі. Але ён асабіста падпісваў дакументы ад імя Recyclix, а пазней — афармляў адпраўку пасылак з запальнымі прыладамі з DHL-аддзялення ў Вільні.

Відэазапіс з камеры назірання, апублікаваная Wall Street Journal, пацвярджае яго прысутнасць на месцы адпраўкі.

Фігуранты абедзвюх пірамід, паводле звестак следства, былі звязаныя з Расіяй.

Адзін з ключавых удзельнікаў, былы баец ПВК «Вагнер» Ігар Кекшын, цяпер супрацоўнічае са следствам у Іспаніі. Яшчэ адзін — IT-спецыяліст Віталь Маркевіч — пасля пачатку вайны адкрыў пад Пецярбургам завод па вытворчасці дронаў.

Следчыя і журналісты паказваюць: за абедзвюма схемамі, хутчэй за ўсё, стаялі расійскія спецслужбы, якія выкарыстоўвалі гэтыя схемы і для фінансавання, і для вярбоўкі.

Аляксандрас Шуранавас цяпер затрыманы ў Літве. Ён — першы грамадзянін краіны, афіцыйна абвінавачаны ва ўдзеле ў аперацыі ГРУ на тэрыторыі ЕС. Яго справа стала часткай маштабнага еўрапейскага расследавання, каардынаванага Германіяй, Польшчай, Францыяй і Еўраполам. Па ўсёй Еўропе прайшлі ператрусы, канфіскавана абсталяванне, арыштаваныя дзясяткі падазраваных. 

• 4
• 0
• 0
• 0
• 0
• 0
• 1
• 0