«Заехаў у кватэру і адкрыў там бізнэс». Як пакараць шумнага суседа паводле закона?
Мінчанка паскардзілася на шумнага суседа, які вырашыў арганізаваць прадпрымальніцкую дзейнасць проста ў здымнай кватэры.
Як можна паўплываць на шумнага кватаранта і наколькі законная яго дзейнасць, растлумачылі ў Ленінскім РАУС сталіцы, пішуць «Мінск-Навіны».
— Другая кватэра на нашай лесвічнай пляцоўцы здаецца. Нядаўна ў яе заехаў студэнт, і вечарамі да яго патокам сталі прыходзіць людзі. Прычым заўсёды розныя, і, як правіла, яны надоўга не затрымліваюцца, — расказвае Ксенія. — Аднойчы муж не вытрымаў бясконцага бразгання дзвярыма і пацікавіўся, што ж так цягне гасцей у тую кватэру. Аказалася, хлопец гандлюе таннымі вэйпамі і вадкасцямі праз інтэрнэт, а дома выдае заказы. Гэта законна? Ці можна ўсё гэта спыніць?
Паводле слоў участковага інспектара міліцыі Ленінскага РУУС лейтэнанта міліцыі Мікіты Філончыка, колькасць людзей, якіх можна запрашаць у госці ў шматкватэрным доме, не абмежавана. Тым не менш, грамадзяне не павінны парушаць спакой іншых жыхароў.
— Калі гучны гук з-за рэзкага закрыцця дзвярэй працягваецца пасля 23:00 або пачынаецца раней за 07:00, то гэта лічыцца парушэннем Правілаў карыстання жылымі памяшканнямі, што цягне адміністрацыйную адказнасць паводле ч. 1 арт. 22.12 КаАП і штраф у памеры ад 2 да 10 базавых велічынь (1 базавая — 42 рублі). Хаця вырашыць праблему можна менш радыкальным спосабам: часам дастаткова патлумачыць суседу, што яго паводзіны ствараюць вам нязручнасці. Калі гэта не дапаможа, звярніцеся па дапамогу да свайго ўчастковага падчас прыёму грамадзян або апішыце праблему ў чат-боце «Зваротная сувязь Мінскай Міліцыі афіцыйны». Супрацоўнік правядзе прафілактычную гутарку, вынесе папярэджанне або складзе пратакол, — патлумачылі ў РУУС.
Каментары
"Паводле слоў участковага інспектара міліцыі Ленінскага РУУС лейтэнанта міліцыі Мікіты Філончыка, колькасць людзей, якіх можна запрашаць у госці ў шматкватэрным доме, не абмежавана."
дык законна ці не?