Прадстаўнік Крамля Дзмітрый Пяскоў у чацвер пракаментаваў заяву дзяржсакратара ЗША Марка Рубіа пра тое, што Белы дом накіраваў прэзідэнту Расіі запрашэнне на снежаньскі саміт G20.
Ці прыме Пуцін запрашэнне, якое прадугледжвае новую сустрэчу з прэзідэнтам Дональдам Трампам, яшчэ не вырашана, паведаміў Пяскоў, піша Бі-бі-сі.
«Пакуль пра гэта гаварыць заўчасна, рашэнне яшчэ не прынятае. Мы сапраўды з удзячнасцю ўспрымаем гэтае ветлівае запрашэнне. Мы цэнім гэтае запрашэнне, і яно будзе прапрацаванае», — сказаў ён журналістам.
Напярэдадні дзяржаўны сакратар ЗША сустракаўся з кіраўніком МЗС Расіі Сяргеем Лаўровым на палях Генеральнай асамблеі ААН. Пасля сустрэчы, якая працягвалася 52 хвіліны, Рубіа сказаў журналістам: «Мы запрасілі прэзідэнта Пуціна на саміт G20. Мы лічым, што гэта магчымасць для яго пагутарыць не толькі з нашым прэзідэнтам, але і з іншымі сусветнымі лідарамі. Мы спадзяёмся, што ён прыме гэтае запрашэнне і што ў снежні такая сустрэча адбудзецца».
Пяскоў заявіў, што Расія будзе ўдзельнічаць у G20, як і ў папярэднія гады: «Яе [Расіі] удзел можа быць або на вышэйшым узроўні, або на больш нізкім узроўні, на працоўным узроўні. Але ў кожным выпадку Расія мае на ўвазе максімальна эфектыўна працягваць свой удзел».
Каментары