Член саудаўскай каралеўскай сям'і Аль-Валід ібн Халед Аль Сауд трапіў у кому ў далёкім 2005 годзе пасля сур'ёзнага ДТЗ у Лондане, дзе праходзіў навучанне ў вайсковай вучэльні. Памёр жа толькі цяпер, маючы 36 гадоў. Пра смерць сына ў сацыяльных сетках паведаміў ягоны бацька, прынц Халед ібн Таляль ібн Абдулазіз.
У 2005-м хлопцу было ўсяго 16 гадоў, а ў аўтакатастрофе ён атрымаў вельмі моцную чэрапна-мазгавую траўму і кровазліццё ў мозг.
З тых часоў ён знаходзіўся ў коме і быў шпіталізаваны ў медыцынскі цэнтр імя караля Абдул-Азіза ў Эр-Рыядзе, дзе знаходзіўся на апараце жыццезабеспячэння пад пастаянным наглядам дактароў.
Усе гэтыя гады бацька Аль-Валіда прынц Халед адмаўляўся адключаць апарат, хоць дактары некалькі разоў раілі гэта зрабіць і запэўнівалі, што шанцаў выжыць у хлопца няма.
«Калі б Бог хацеў, каб сын загінуў у гэтай аварыі, ён бы цяпер быў у магіле», — рашуча казаў Халед пра свайго сына, а маці хлопца, прынцэса Рыма бінт Талал, мужа ў гэтым падтрымлівала.
У 2019-2020 гадах нават з'яўляліся абнадзейлівыя навіны пра тое, што «спячы прынц» нібыта паварушыў рукой і нават публікаваліся адпаведныя відэа. Чуткі, што ў яго стане назіраецца паляпшэнне, сталі зноў пашырацца літаральна ў апошні час, але ніякіх афіцыйных пацвярджэнняў гэтаму не было. Сёння ж ягонае сэрца канчаткова спынілася.
Да трагічнага дня, які назаўсёды змяніў і фактычна скончыў яго сапраўднае жыццё, малады Аль-Валід марыў пра будучыню, вартую прадстаўніка каралеўскай дынастыі. Ён абраў для сябе вайсковую кар’еру і вучыўся ў прэстыжнай вайсковай вучэльні ў Вялікабрытаніі.
Да трагедыі пра асабістае жыццё Аль-Валіда амаль нічога не было вядома. У адрозненне ад іншых каралеўскіх асобаў, ён рэдка трапляў у загалоўкі СМІ, а ягонае фота амаль не з’яўлялася ў публічнай прасторы.
Аль-Валід ібн Халед Аль Сауд быў прапраўнукам Абдул-Азіза ібн Абдурахмана Аль Сауда (1877-1953) — заснавальніка і першага караля Саудаўскай Аравіі. Наступныя шэсць каралёў гэтай краіны, уключаючы і цяперашняга 89-гадовага Салмана ібн Абдул-Азіза Аль Сауда — родныя сыны Абдул-Азіза, які меў ад больш чым 20 жонак 45 сыноў і больш за 20 дочак. Таму каралеўская сям'я Саудаўскай Аравіі — вельмі вялікая і разгалінаваная, яна ўключае тысячы чалавек.
Цяпер чытаюць
«Яна гадамі цярпела, а пасля адзін раз ударыла мужа нажом — гэтага хапіла, каб забіць»2
Каментары