Памерла найстарэйшы прадстаўнік каралеўскай сям'і ў Брытаніі. Герцагіня пакінула каралеўскае жыццё, каб стаць школьнай настаўніцай
Герцагіня Кенцкая, якая памерла ва ўзросце 92 гадоў 5 верасня, выконвала свае каралеўскія абавязкі, прыцягваючы мінімум увагі, піша Бі-бі-сі.
Найбольш публіка ведала яе як элегантную жанчыну, якая штогод уручала трафеі на Уімблдоне, а аднойчы нават суцяшала засмучаную фіналістку.
Яна стала першым прадстаўніком каралеўскай сям’і, якая прыняла каталіцызм пасля Акту аб наследаванні трона 1701 года — але гэта не стала самым вялікім сюрпрызам з яе боку.
Асэнсаваўшы, што яе дзве страсці — гэта музыка і дзеці, яна ціха адышла ад каралеўскага жыцця і ўладкавалася настаўніцай музыкі ў пачатковай школе ў Кінгстан-апон-Хал.
Яна нават перастала карыстацца тытулам Яе Каралеўская Высокасць. У настаўніцкай яна была проста «Кэт», а для дзяцей — «місіс Кент».
Самотнае дзяцінства
Кэтрын Люсі Мэры Уорслі нарадзілася ў Ёркшыры ў 1933 годзе. Яе домам быў Хоўінгем-Хол — вялікі маёнтак, які належаў сям’і на працягу стагоддзяў.
Яна не была высакароднага паходжання, але сям’я Уорслі была заможнай. Яе дзед, Джон Брунэр, заснаваў кампанію па вытворчасці фарбаў і хімікатаў, якая пазней стала ICI.
Паколькі братоў адправілі ў закрытую школу, дзяцінства Кэтрын было самотным. Падчас Другой сусветнай вайны яе адзінымі пастаяннымі спадарожніцамі часта былі маці і старая гувернантка.
Яна знаходзіла суцяшэнне ў пагорках і пустках Ёркшыру. Фатограф Сэсіл Бітан, які часта бываў у іх доме, апісаў яе як «дзяўчыну, што вельмі любіла быць на прыродзе».
Калі ёй споўнілася 10, ёй дазволілі пайсці ў школу — спачатку ў Сэнт-Маргарэт у Ёрку, а пазней у Рантан-Хіл у Норфалку.
Рантан-Хіл быў змрочным закладам, але менавіта там Кэтрын пазнаёмілася з музыкай — сваёй пажыццёвай страсцю. Яна навучылася граць на фартэпіяна і скрыпцы, а таксама — маючы цудоўны голас — брала ўрокі спеву.
Пасля заканчэння школы ёй не ўдалося паступіць у Каралеўскую акадэмію музыкі, таму яна пайшла ў школу міс Х’юблер у Оксфардзе.
Дэбютантка
Нягледзячы на адсутнасць дыпломаў, бацькі ўладкавалі яе на працу ў элітны дзіцячы садок — але на самой справе іх мэтай заставалася знайсці ёй мужа.
Як прыгожая і багатая дэбютантка, Кэтрын пазнаёмілася з многімі віднымі маладымі мужчынамі 1950-х гадоў — і сярод іх быў прынц Эдвард, герцаг Кенцкі, унук Георга V.
На момант яго нараджэння прынц Эдвард быў шостым у чарзе на трон — настолькі блізкім, што па законе на яго нараджэнні павінен быў прысутнічаць міністр унутраных спраў, каб пацвердзіць будучыя правы на спадчыну.
Прынц Эдвард толькі што скончыў Сандхэрст і служыў афіцэрам у Кэтэрыку, недалёка ад яе роднага дома — але яго маці, прынцэса Марынa, нібыта не ўхваляла іх адносінаў.
Яна хоць і была багатай, але ўсё ж заставалася просталюдзінкай. Герцаг быў адпраўлены ў Германію, каб астудзіць пачуцці, але адлегласць не загасіла полымя.
Тым часам Кэтрын з сяброўкай адправіліся ў падарожжа аўтобусам у Мексіку. Падарожжа цягнулася некалькі месяцаў, і калі яна прыбыла ў пункт прызначэння, там яе чакалі кветкі з паштоўкай ад «Э».
Пара абвясціла пра заручыны ў сакавіку 1961 года, а праз месяц ажанілася.
Ікона стылю
Каб яшчэ больш уразіць сям’ю, яны вырашылі не выбіраць для вяселля Вестмінстэрскае абацтва ці сабор Святога Паўла.
Сяброў і родных запрасілі ў Ёркскі сабор — храм, дзе апошні раз адбывалася каралеўскае вяселле ў 1328 годзе.
Газеты былі ў захапленні ад новага прадстаўніка каралеўскай сям’і, і Кэтрын не расчаравала.
Напярэдадні вяселля яе сфатаграфавалі ў самым модным уборы 1960-х — міні-спадніцы.
З цягам часу нарадзіліся яшчэ двое дзяцей: лэдзі Хэлен і лорд Нікалас Віндзар. Але ў 1975 годзе падчас чацвёртай цяжарнасці Кэтрын захварэла на краснуху.
Дактары раілі зрабіць аборт, бо хвароба часта шкодзіць ненароджаным дзецям. Пасля кансультацый з рэлігійнымі аўтарытэтамі Кэтрын перапыніла цяжарнасць.
Праз два гады пятая цяжарнасць завяршылася нараджэннем мёртвага сына Патрыка.
«Гэта аказала разбуральны ўплыў на мяне, — казала яна пазней. — Я пакутавала ад вострай дэпрэсіі. Думаю, рэдка хто вытрымаў бы такое выпрабаванне».
Нервовае знясіленне
У 1976 годзе прынц Эдвард пакінуў армію, узяў на сябе больш каралеўскіх абавязкаў і стаў намеснікам кіраўніка Брытанскай рады па знешнім гандлі.
Новае жыццё патрабавала пастаянных паездак, і герцагіня пачала адчуваць стомленасць. Смерць бацькоў пагоршыла яе стан.
У 1978 годзе яна трапіла ў бальніцу з «нервовым знясіленнем», але неўзабаве паступова вярнулася да публічнай дзейнасці — у прыватнасці, да працы з арганізацыямі, што дапамагалі маладым і сталым людзям.
Найбольш вядомай яе роляй было ўручэнне трафеяў на Уімблдоне, дзе, паводле паведамленняў, менавіта яна адыграла ключавую ролю ў скасаванні традыцыі, калі гульцы павінны былі кланяцца або прысесці перад каралеўскай ложай.
Яе рашэнне падтрымала каралева Лізавета, якая пастанавіла, што месца прынца Эдварда ў чарзе на трон застанецца нязменным.
Кэтрын працягвала працаваць з ЮНІСЕФ і дапамагаць ахвярам мін у Камбоджы, але ўсё больш аддалялася ад каралеўскай сям’і. Яна нават абвясціла, што больш не будзе карыстацца тытулам Яе Каралеўская Высокасць, і пачала жыць з мужам асобна.
Называйце мяне «Кэтрын Кент»
Яна пачала прадстаўляцца проста як Кэтрын Кент.
«Я не люблю быць публічнай асобай і кажу гэта вельмі шчыра, — прызнавалася яна. — Гэта мая натура, такой я нарадзілася. Я люблю працаваць ціха, за кулісамі. Я вельмі сарамлівы чалавек».
Яна стала настаўніцай музыкі ў пачатковай школе Вансбек у Кінгстан-апон-Хал, дзе вялікую ўвагу надавалі навучанню дзяцей з асаблівымі адукацыйнымі патрэбамі. Толькі дырэктар школы ведаў, хто яна насамрэч.
«Вучні пачатковай школы — як маленькія губкі, — казала Кэтрын. — Яны вельмі ахвотна вучацца, і таму выкладаць ім — сапраўднае задавальненне».
У 2004 годзе Кэтрын заснавала дабрачынны фонд Future Talent, каб даць дзецям з бедных сем’яў магчымасць займацца музыкай.
У партнёрстве са школамі дзецям выдавалі інструменты і заахвочвалі развіваць музычныя здольнасці.
І выкладала яна не толькі класічную музыку.
Жарсць да рэпу
У інтэрв’ю Guardian герцагіня прызналася, што любіць Eminem і Ice Cube — хаця дадала, што не можа гэтага сказаць пра Kanye West ці Stormzy.
«Калі вы ўбачыце кагосьці на трасе М40, хто выглядае трохі дзіўна, — гэта я спрабую чытаць рэп у машыне па дарозе дадому», — сказала яна здзіўленаму журналісту.
Кэтрын, герцагіня Кенцкая, рэдка пакідала сваю добраахвотную ізаляцыю, хоць у 2018 годзе наведала вяселле прынца Гары.
Яна таксама, па запрашэнні каралевы Лізаветы, была сярод нешматлікіх, хто ўдзельнічаў у пахаванні герцага Эдынбургскага — але была занадта слабой, каб прысутнічаць на каранацыі караля Карла III у 2023 годзе.
Яе запомняць па тых абдымках з чэшскай тэнісісткай Янай Новатнай, па яе годнасці і ціхім спачуванні, а таксама як «каралеўскую асобу па прымусе», якая ўрэшце вырашыла, што яе сапраўднае пакліканне — навучаць дзяцей любіць музыку.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд25
Каментары