У Нацбанку расказалі, на колькі частак можа быць разарваная банкнота, каб яе абмянялі на цэлую
Намеснік начальніка Галоўнага ўпраўлення наяўнага грашовага абарачэння Нацыянальнага банка Беларусі Раман Цітоў расказаў выданню «Народная газета», на колькі частак можа быць разарваная банкнота беларускага рубля, каб яе абмянялі на цэлую.
Па словах Рамана Цітова, усё вызначаецца інструкцыяй №211 рэгулятара аб парадку вызначэння плацежнасці і абмену банкнот і манет. І галоўнае для прыёму ў банку папяровых грошай, якія маюць пашкоджанні — тое, каб яны страцілі не больш за 45% першапачатковай плошчы.
Сюды ж адносяцца, заўважыў Цітоў, і «злепленыя з частак (без уліку іх колькасці), якія безумоўна належаць адной банкноце і складаюць не менш за 55% ад першапачатковай плошчы банкноты».
«Пры даследаванні такой купюры неабходна ўлічваць, што яна падлягае абмену ў тым выпадку, калі маецца адна частка, якая займае не менш за 55% ад яе плошчы, або некалькі фрагментаў, бясспрэчна прыналежных адной банкноце, плошча якіх у сукупнасці складае не менш за 55% ад першапачатковага фармату банкноты. Колькасць частак, на якія разарваная або разрэзаная банкнота, значэння не мае», — сказаў прадстаўнік Нацбанка.
Раман Цітоў заўважыў, што пры аналізе фрагментаў банкноты таго ці іншага наміналу беларускага рубля ўлічаць лініі разрыву або разрэзу, вадзяныя знакі, графічныя выявы, памеры палёў, нумары серый.
«Калі банкнота складзеная з дзвюх частак, у тым ліку розных наміналаў, і плошча кожнай складае не менш за 55% ад першапачатковага фармату купюры, якая адпавядае вызначанаму наміналу, то кожная частка разглядаецца як асобная банкнота і падлягае абмену», — дадаў Раман Цітоў.
Цяпер чытаюць
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне8
Каментары