«Найлепшы калядны падарунак»: беларуска перамагла бюракратыю і атрымала ў Нарвегіі пашпарт замежніка

Сваім шчасцем беларуска падзялілася ў сацсетках. Яна кажа, што гэта найлепшы падарунак на Новы год.

Жанчына знаходзіцца ў Нарвегіі па працоўнай візе. Прыблізна год таму ў яе дачкі скончыўся беларускі пашпарт. Сама маці не мае магчымасці паехаць на радзіму, каб зрабіць дзіцяці новы дакумент — бо добра разумее рызыку трапіць за краты.

Таму жанчына вырашыла паспрабаваць атрымаць для дачкі пашпарт замежніка ў Нарвегіі.

— Матывавала неабходнасць атрымаць трэвэл док тым, што я знаходжуся ў спісе «Вясны», была затрыманая ў 2020 годзе. Дадала адказ беларускай амбасады ў Швецыі пра тое, што пашпарт можна атрымаць толькі ў Беларусі. Але тады мы атрымалі адмову.

Беларуска вырашыла не здавацца і падала апеляцыю. Яна кажа, што не звярталася па дапамогу да юрыстаў ці адвакатаў — проста прытрымлівалася стандартнай працэдуры, прынятай у Нарвегіі.

— Пасля адмовы UDI (іміграцыйная служба Нарвегіі) чалавек можа аўтаматычна падаць апеляцыю праз яе сайт. Апеляцыю разглядае ўжо UNE (апеляцыйная рада па справах замежнікаў). Гэта незалежны орган, які правярае рашэнні і можа ці пацвердзіць іх, ці адмяніць.

І вось нядаўна беларуска даведалася, што UNE адмяніла рашэнне UDI. У матывацыйнай частцы было адзначана, што існуюць асаблівыя падставы, якія сведчаць пра неабходнасць выдачы заяўніку пашпарта іншаземца:

«Гэта звязана з абноўленай інфармацыяй пра краіну, згодна з якой для арышту пры ўездзе ў Беларусь пасля знаходжання за мяжой дастаткова вельмі невялікай колькасці даных. Значная частка інфармацыі адсочваецца беларускімі ўладамі і рэгіструецца ў базах даных, якія правяраюцца пры вяртанні. Акрамя таго, пры ўездзе ўлады правяраюць тэлефоны, гісторыю пошуку, паведамленні і падобнае. Ёсць таксама прыклады людзей, якія доўгі час пражывалі за мяжой і неаднаразова ўязджалі і выязджалі з сваёй краіны без праблем, але затым былі арыштаваныя пасля ўезду».

Пашпарт замежніка маленькая беларуска ўжо атрымала. Яе маці лічыць, што ў гэтым вялікая заслуга Офіса Святланы Ціханоўскай:

— Бо год таму нам адмовілі з фармулёўкай кшталту «Не разумеем, чаму б вам не паехаць у Беларусь і не зрабіць новы пашпарт». Хаця ўвесь кейс быў акурат пра тое, чаму. А апеляцыйны орган адмяніў рашэнне праз год з падрабязным разуменнем рэальнай палітычнай сітуацыі ў Беларусі і становішчам людзей, якія выехалі за мяжу.

Пытаннем, каб беларусы ў Нарвегіі маглі атрымоўваць пашпарты замежнікаў, займалася таксама Задзіночанне беларускіх студэнтаў.

• 13
• 1
• 0
• 0
• 0
• 0
• 0
• 0