Мінчук чуе гук ліфта ў сваёй кватэры. Са скаргай ён звярнуўся да чыноўнікаў
Жыхар комплексу «Мінск-Свет» сцвярджае, што праз два гады пасля засялення пачаў чуць працу ліфтаў проста ў кватэры. Са скаргай на пастаянны шум мужчына дайшоў да асабістага прыёму ў кіраўніка адміністрацыі Кастрычніцкага раёна, піша Onliner.by.
Мінчук жыве на другім паверсе. Паводле яго слоў, раней ніякага дыскамфорту ён не адчуваў, але апошнім часам стаў выразна чуць гук працы ліфтавага абсталявання. Менавіта таму ён упэўнены: праблема не ў планіроўцы дома, а ў няспраўнасці саміх ліфтаў.
Спачатку мужчына звярнуўся ў арганізацыю «Хэпі Планет». Спецыялісты правялі абследаванне абсталявання і выканалі шумаізаляцыю створак дзвярэй ліфтавай шахты. Аднак вынік жыхара не задаволіў — шум, як ён кажа, нікуды не знік.
Тады да сітуацыі падключыўся раённы Цэнтр гігіены і эпідэміялогіі. Спецыялісты правялі замеры ўзроўню шуму, але перавышэнняў нарматываў не зафіксавалі. З гэтым заключэннем мінчанін не пагадзіўся і працягнуў настойваць на тым, што жыць у такіх умовах немагчыма.
На прыёме кіраўнік раёна падкрэсліў: спецыялісты наглядных органаў нясуць персанальную адказнасць за выдадзеныя заключэнні, таму сумнявацца ў іх аб’ектыўнасці падстаў няма. Разам з тым арганізацыі, якая абслугоўвае інфраструктуру, даручылі паўторна разгледзець сітуацыю і, пры неабходнасці, дадаткова выканаць работы па шумаізаляцыі.
Каментары