Другакласнік у Германіі падаў заяўку на вакансію інспектара дзіцячых пляцовак. І яго амаль узялі!
Сямігадовы Міха з гарадка Зінсхайм на поўдні Германіі нядоўга разважаў, калі даведаўся, што ў горадзе адкрылася вакансія інспектара дзіцячых пляцовак.
З дапамогай таты ён склаў рэзюмэ з суправаджальным лістом, дзе напісаў, што дзіцячыя пляцоўкі, на ягоную думку, павінны быць не толькі бяспечнымі, але і «добра пратэставанымі», паведамляе тэлеграм-канал «Што там у немцаў».
У хлопчыка было і дакладнае ўяўленне пра тое, што ўваходзіць у кола абавязкаў інспектара дзіцячых пляцовак, пра што ён распавёў на гутарцы.
Міха таксама апісаў свае чаканні адносна заробку: за праверку горак і арэляў ён хацеў бы атрымліваць 17—18 еўра за гадзіну.
Калі ў адміністрацыі Зінсхайма ўбачылі заяўку ад другакласніка, то неадкладна запрасілі такога амбіцыйнага кандыдата на пробнае заданне.
Міха, адзеты ў штаны з абаронай ад бруду, гумовыя боты і святлоадбівальную камізэльку, прадэманстраваў свой «прафесіяналізм» на адной з дзіцячых пляцовак Зінсхайма.
У кампаніі двух дарослых спецыялістаў ён праверыў брусы, горкі, арэлі і батуты. Вердыкт Міхі: пляцоўка ў добрым стане. Аднак хлопчык застаўся расчараваны тым, што інспектары так мала лазяць і катаюцца з горкі.
Улады Зінсхайма адзначылі кар’ерныя амбіцыі хлопчыка ў такім юным узросце.
«Калі нехта ў такім узросце праяўляе цікавасць да працы ў адміністрацыі, мы з радасцю гэта падтрымліваем», — сказаў обер-бургамістр Марка Зізінг.
Праўда, пасаду інспектара Міха пакуль не атрымаў — яго галоўны абавязак цяпер хадзіць у школу.
Сам хлопчык лічыць, што для працы інспектарам дзеці падыходзяць значна лепш за дарослых. «Яны нават не ведаюць, што на пляцоўцы напраўду прыносіць весялосць», — кажа Міха.
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць3434
Каментары