Заруба ў расійскім судзе: падатковая Кіраўскай вобласці шантажавала багаценькую «дачку» «Беларуснафты» банкруцтвам
Напрыканцы 2025 года падаткавікі Кіраўскай вобласці Расіі накіравалі ў Арбітражны суд Масквы заяву аб прызнанні банкрутам кампаніі «Янгпур» — супербагатай расійскай дачкі «Беларуснафты», якая займаецца здабычай нафты і газа ў Расіі. Як аказалася, пытанне было ў доўгу на $19 тысяч. Аднак суд спыніў маразм.
АТ «Нафтавая кампанія «Янгпур» — даччыная кампанія «Беларуснафты», якая з 2013 года вядзе разведку і здабычу нафты і газа на тэрыторыі Ямала-Ненецкай аўтаномнай акругі Расіі.
У студзені 2026 года кампанія трапіла ў дзіўныя загалоўкі расійскіх СМІ, ёй прадказвалі банкруцтва. Усё таму, што ў Маскоўскім арбітражным судзе з'явілася справа аб прызнанні «Янгпура» банкрутам па патрабаванні падатковай службы Кіраўскай вобласці.
Апошні суд па справе адбыўся 3 сакавіка. У выніку аказалася, што ніякай гаворкі пра банкруцтва «Янгпура» — кампаніі з гадавой выручкай каля 330 мільёнаў даляраў — не ідзе.
Насамрэч Кіраўская падатковая вырашыла такім арыгінальным чынам падштурхнуць «Янгпур» да сплаты доўга памерам каля 19 тысяч даляраў.
Заява аб прызнанні «Янгпура» банкрутам была пададзена ў суд 26 снежня 2025 года. У пачатку студзеня суд прыняў заяву. З таго часу бакі перакінуліся некалькімі хадайніцтвамі да суда.
Кіраўская падатковая апошнім аргументам прасіла суд прызначыць арбітражнага кіраўніка, то-бок чалавека, які па прызначэнні суда бярэ на сябе кіраванне кампаніяй-даўжніком, а таксама праводзіць ацэнку маёмасці і распрадае яе для пагашэння даўгоў.
У той жа самы час валавы прыбытак «Янгпура» за апошні вядомы год (2024) склаў каля 94 мільёнаў даляраў. Іншымі словамі, было ясна, што кампанія проста не пагаджаецца з налічаным падаткам.
У выніку адшукаць 19 тысяч даляраў, каб угаманіць юрыстаў Кіраўскай падатковай, усё ж прыйшлося. Яны адклікалі заяву, а на суд не з'явіліся.
«Прадстаўнік даўжніка ўказаў, што запазычанасць перад паўнамоцным органам пагашана ў поўным аб'ёме. Прадстаўнік заяўніка на пасяджэнне не з'явіўся […] Суд вызначыў: прыняць адмову УФПС Расіі па Кіраўскай вобласці ад заявы аб прызнанні банкрутам АТ «НК «ЯНГПУР». Спыніць вытворчасць па справе», — гаворыцца ў пастанове Маскоўскага арбітражнага суда.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі68
Каментары