Расійскі ўрад абмяркоўвае магчымасць скарачэння выдаткаў федэральнага бюджэту з-за падзення даходаў і росту дэфіцыту. Паводле крыніц Reuters, выдаткі могуць быць зменшаныя прыкладна на 10% па большасці артыкулаў, акрамя абаронных і так званых «абароненых» выдаткаў, у тым ліку сацыяльных. Канчатковае рашэнне будзе залежаць ад сітуацыі з цэнамі на нафту.
Па словах адной з крыніц, Міністэрства фінансаў ужо паведаміла галоўным распарадчыкам бюджэтных сродкаў пра неабходнасць скарачэння выдаткаў, і цяпер ведамствы вырашаюць, што менавіта можна скараціць. Найперш могуць пацярпець «неабавязковыя» выдаткі — напрыклад, новыя будаўнічыя праекты, рамонт дарог або іншыя інфраструктурныя работы.
За студзень—люты федэральны бюджэт Расіі быў выкананы з дэфіцытам 3,5 трыльёнаў рублёў (каля 44,17 мільярда даляраў). Даходы склалі 4,76 трыльёна рублёў (60,08 мільярда даляраў), у той час як выдаткі — 8,21 трыльёна (103,62 мільярда даляраў). Паступленні ад нафты і газу ўпалі на 47% і дасягнулі мінімуму з часоў пандэміі — каля 400 мільярдаў рублёў (5,05 мільярда даляраў) у кожным з двух месяцаў. Агульныя даходы бюджэту скараціліся на 11%, нягледзячы на павышэнне ПДВ і падаткаў для малога бізнэсу.
На фоне канфлікту вакол Ірана цэны нафты часова выраслі: Brent даходзіла да 119 даляраў за бараль, а расійская Urals — да 75 даляраў. Аднак эксперты лічаць такі рост нестабільным і мяркуюць, што выдаткі ўсё адно давядзецца аптымізаваць.
У бюджэце на 2026 год запланаваныя выдаткі на суму 44,1 трыльёна рублёў (556,61 мільярда даляраў). З іх 12,9 трыльёна (162,84 мільярда даляраў) павінны пайсці на «абарону», а разам з выдаткамі на бяспеку — 16,84 трыльёна рублёў (212,57 мільярда даляраў), або каля 38% усяго бюджэту.
Паводле ацэнак аналітыкаў, фактычныя даходы могуць аказацца на 3 трыльёны рублёў (37,87 мільярда даляраў) меншымі за запланаваныя. Калі сярэдняя цана нафты складзе каля 50 даляраў за бараль, расійскі бюджэт можа недаатрымаць 2 трыльёны рублёў (25,25 мільярда даляраў) нафтагазавых даходаў і яшчэ каля 1 трыльёна (12,62 мільярда даляраў) па іншых падатках. У выніку дэфіцыт можа вырасці да 6,8 трыльёна рублёў (85,83 мільярда даляраў).
Аналітыкі адзначаюць, што расійскае Міністэрства фінансаў можа адносна бязбольна скараціць каля 1 трыльёна рублёў (12,62 мільярда даляраў) — менавіта столькі складаюць выдаткі, якія пакуль не размеркаваныя па канкрэтных артыкулах.
Цяпер чытаюць
Малодшы сын Сахашчыка абвешчаны зніклым без вестак. Выглядае, ён ваяваў за Расію88
Каментары