Памятаеце студэнтку ЕГУ, якая змагалася супраць харасменту выкладчыка? Яна прайграла суд і вінная ўніверсітэту 8 тысяч еўра
У 2023 годзе ў ЕГУ выбухнуў скандал: мастака і выкладчыка Сяргея Сялецкага абвінавацілі ў неэтычных паводзінах у дачыненні да студэнтак і праз некалькі месяцаў разбіральніцтва звольнілі. Таццяна Барысава была адной са студэнтак, якая паскардзілася на Сялецкага публічна. Праўда, гэтым справа не скончылася.
Па выніку атрымалася так, што з універсітэта адлічылі саму Барысаву, а першапачаткова звольнены выкладчык быў адноўлены на працы па рашэнні суда. Дзяўчына таксама пайшла ў суд, каб яе адлічэнне прызналі незаконным — яе сапраўды вярнулі ў ЕГУ, але зараз універсітэт выйграў апеляцыю і спісаў з яе 8 600 еўра.
«Першы суд па маім адлічэнні я вяла сама — сама пісала ўсе тэксты (апроч разліку шкоды), выклікала сведак, выступала — і выйграла часткова. Але апеляцыю, якая праходзіць пісьмова і завочна, я цалкам аддала дзяржаўнаму адвакату і не прачытала ніводнага тэксту са справы, апроч фінальных абзацаў — выплаціць 7719,62 універсітэту за адваката. Так ужо атрымалася, што ўвесь гэты час я працавала як конь, часам па 240 гадзін у месяц — таму не заставалася ні часу, ні сіл на чытанне судовых тэкстаў, не кажучы ўжо пра напісанне», — расказала Таццяна ў сваім фэйсбуку.
«Цяпер праз прыстава мае рахункі выведзеныя ў мінус 8 500 (апроч ЕГУшных грошай, ёсць яшчэ нацэнка прыстава)».
Таццяна не разумее, якія маглі быць аргументы на карысць таго, каб суд прызнаў яе ранейшае адлічэнне законным. Нягледзячы на няпростую жыццёвую сітуацыю, яна не адчайваецца:
«Калі я і далей летам буду варочаць каменную вату і дзяўбці ломам грунт у свае выходныя (дзякуючы чужым бальнічным і адпачынкам), то менш чым праз год выйду ў плюс — зарплата ў мяне выдатная, і сама праца таксама. Калі што, паспела зняць грошы на арэнду кватэры на май, так што ў бліжэйшы час бяздомнай не стану».
Нагадаем, Таццяна разам з іншымі студэнткамі расказала пра прыніжэнні з боку Сялецкага. Па яе словах, выкладчык зневажаў яе за нацыянальнасць і фінансавае становішча (дзяўчына родам з Расіі і на той час адна выхоўвала маленькага сына), распаўсюджваў пра яе чуткі.
Пасля інтэрв'ю Таццяны Сялецкі падаў на яе скаргу ва ўніверсітэцкую камісію па этыцы, дзяўчына адказала адкрытым лістом да ўніверсітэцкай супольнасці. Далей скаргу на яе падаў сам рэктар, і ў снежні 2023‑га Таццяну адлічылі. Пазней віленскі суд адмяніў тое рашэнне, аднак па выніку яно ўсё ж было прызнанае законным, і дзяўчына засталася вінная ЕГУ грошы за адваката.
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары