Кошт квадратнага метра жылля ў Мінску з пачатку года вырас больш як на чвэрць
Дзяржаўны камітэт па маёмасці падвёў вынікі першага паўгоддзя 2026 года на рынку жылля Мінска. Нягледзячы на скарачэнне колькасці здзелак куплі-продажу, цэны на кватэры працягваюць расці. Спецыялісты тлумачаць гэта найперш дэфіцытам прапаноў.
За першыя шэсць месяцаў года колькасць здзелак скарацілася на 17 працэнтаў — прыкладна на 1200 у параўнанні з аналагічным перыядам мінулага года. У чэрвені было заключана 1083 дамовы куплі-продажу, што адпавядае сярэднім паказчыкам красавіка і мая.
Пры гэтым агульная сума купляў павялічылася на 5 працэнтаў і дасягнула 689,8 мільёна даляраў. Адначасова агульная плошча прададзенага жылля зменшылася на 17 працэнтаў.
Сярэдні кошт квадратнага метра на другасным рынку за год вырас на 27 працэнтаў. У сярэднім квадратны метр у аднапакаёвых кватэрах цяпер каштуе 2370 даляраў, у двухпакаёвых — 2120 даляраў, у трохпакаёвых — 1970 даляраў.
Самы высокі кошт квадратнага метра зафіксаваны ў Цэнтральным раёне Мінска — каля 2600 даляраў. Найбольш актыўным па колькасці здзелак стаў Кастрычніцкі раён, дзе за паўгоддзе было заключана 621 пагадненне.
Попыт на новабудоўлі крыху знізіўся. Іх доля ў агульнай колькасці здзелак скарацілася з 30 да 25 працэнтаў, а ўдзельная вага першаснага рынку вярнулася да звычайнага ўзроўню ў межах 9—12 працэнтаў.
Эксперты звязваюць рост цэн з даступнасцю крэдытаў, павелічэннем даходаў насельніцтва і адносна стабільным курсам беларускага рубля. Яшчэ адной важнай прычынай называюць істотнае змяншэнне колькасці кватэр, выстаўленых на продаж. За год аб'ём прапаноў скараціўся з 6,8 тысячы да 4,5 тысячы аб'ектаў.
У Дзяржаўным камітэце па маёмасці адзначаюць, што цяпер цэны на рынку вызначаюцца не толькі попытам, але і вострым дэфіцытам выбару. Паводле ацэнкі ведамства, пакуль захоўваюцца рост даходаў, даступнасць крэдытаў і недахоп прапаноў, перадумоў для зніжэння кошту жылля ў Мінску няма.
Растаропны магіляўчук перапісаў кватэры на сваякоў, каб не вяртаць доўг
Замест заяўленых шматдзетных сем'яў у новабудоўлю ў Мінску засяляюць ахоўнікаў Лукашэнкі
Беларуска будавала ў Расіі кватэру, але фармальна аформіла іпатэку на стрыечную сястру. І засталася ля разбітага карыта
Праверыць кошт кватэры анлайн можна цяпер не толькі ў Мінску
Цяпер чытаюць
«Калі вы пазакрываеце я**льнікі»: злоўлены на допінгу амапавец з Гродна паказаў сваё высокакультурнае аблічча17
Каментары