У Беларусі распачалі крымінальную справу ў дачыненні да прадстаўнікоў нямецкай кампаніі Bayer, якіх падазраюць ва ўхіленні ад выплаты падаткаў. Пра гэта паведаміў Следчы камітэт.
Паводле версіі следства, кіраўнікі замежных кампаній «Bayer» і АТ «Байер» пры садзейнічанні іншых асоб са студзеня 2020 года да сакавіка 2026‑га займаліся продажам у Беларусі сродкаў аграхімічнай абароны раслін і фармацэўтычнай прадукцыі, не зарэгістраваўшы пастаяннага прадстаўніцтва кампаніі. Гэта, як сцвярджаюць следчыя, парушала патрабаванні заканадаўства.
Каб схаваць такую дзейнасць, фігуранты стварылі ТАА «Байер ВР» і некалькі прадстаўніцтваў замежных кампаній. Як сцвярджае Следчы камітэт, яны не ўлічылі, што атрыманыя даходы падлягалі падаткаабкладанню, і ўхіліліся ад выплаты падаткаў на агульную суму больш за 50 мільёнаў рублёў. Пры гэтым за перыяд, які расследуецца, з беларускіх рахункаў групе кампаній Bayer пералічылі больш за 1,35 мільярда рублёў.
Па крымінальнай справе затрымалі дзесяць чалавек, сярод якіх грамадзяне Беларусі і Расіі. Сямёра з іх узятыя пад варту. Іх дзеянні кваліфікавалі паводле артыкула 243 Крымінальнага кодэкса Беларусі — ухіленне ад выплаты падаткаў. Фігуранты, як сцвярджаецца, супрацоўнічаюць са следствам і даюць прызнальныя паказанні, у тым ліку адносна кіраўніцтва замежнай кампаніі.
Следчыя паведамляюць, што падчас першачарговых следчых дзеянняў атрымалі доказы датычнасці ўсіх падазраваных да злачынстваў. Правялі ператрусы і канфіскавалі дакументы, якія, паводле ведамства, пацвярджаюць незаконную дзейнасць. Сярод іх — ценявыя ўліковыя запісы, спецыфікацыі, дамовы, заяўкі, звесткі пра пастаўкі і зводныя файлы.
Для кампенсацыі магчымай шкоды сілавікі наклалі арышт на нерухомасць і транспартныя сродкі кампаніі, яе рахункі і рахункі замежных прадстаўніцтваў, а таксама на маёмасць падазраваных. Агульны кошт арыштаванай маёмасці складае не менш за 8 мільёнаў рублёў.
Нямецкі канцэрн Bayer — адна з найбуйнейшых у свеце міжнародных кампаній у галіне аховы здароўя і сельскай гаспадаркі, заснаваная яшчэ ў 1863 годзе. У Беларусі Bayer працуе з 2000 года (у 2014 годзе быў адкрыты мясцовы офіс ТАА «Байер»), забяспечваючы краіну фармпрэпаратамі, вітамінамі, а таксама насеннем і сродкамі абароны раслін для аграпрамысловага комплексу.
Пасля 2022 года канцэрн прыпыніў інвестыцыі і рэкламу ў рэгіёне, але працягнуў пастаўкі крытычна важных лекаў і сельскагаспадарчай прадукцыі.
Цяпер чытаюць
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос21
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1313
Каментары
[Зрэдагавана]