Партыйнае кіраўніцтва заклікае грамадзян краіны далучацца да ініцыятыўнай групы Рыгора Кастусёва.
Партыя БНФ звярнулася з адкрытым зваротам да суайчыннікаў. Партыйнае кіраўніцтва лічыць, што «падзеі найбліжэйшага часу могуць стаць ключавымі для лёсу нашай Бацькаўшчыны».
Гаворыцца, што за 16 гадоў панавання Лукашэнка падвёў краіну да «сур’ёзных эканамічных і палітычных праблемаў, якія пагражаюць крахам ягонай сістэме кіравання».
«Ягоны шанец захавання адзінаасобнай улады — гэта далейшы гандаль нацыянальнымі інтарэсамі, перадусім на карысць Крамля і расейскіх алігархаў, узмацненне палітычных і эканамічных рэпрэсіяў супраць уласнага народу», — гаворыцца ў звароце.
Партыя БНФ перасцерагае некаторых сваіх паплечнікаў па апазіцыі ад спадзяванняў на Расію, што з дапамогай яе можна змяніць уладу.
«Якой спакушальнай можа быць думка, што «Расея зменіць рэжым», пазбавіўшы беларусаў ад цяжкага змагання. Падобныя стаўкі на Расею — безадказныя. «Дэмакратызацыя» ў стылі Крамля — замена Лукашэнкі 1.0 на Лукашэнку 2.0 (версія адрэдагаваная і ўпрыгожаная для залагоджвання Захаду) — будзе працягам такой самай палітыкі дэградацыі, толькі з дэмакратычнымі дэкарацыямі.
Няма нічога больш цынічнага, хлуслівага і камічнага за Крэмль, занепакоены дэмакратыяй у суседніх краінах», — адзначаюць бээнэфаўцы.
У такіх умовах Партыя БНФ заяўляе, што «бярэцца за найцяжэйшае», а менавіта за «абарону беларускіх нацыянальных інтарэсаў»
«Партыя БНФ заўсёды ставіць нацыянальныя інтарэсы вышэй за ўсё. Таму, у мінулым, мы вельмі часта саступалі вынікі сваёй працы на карысць розных кааліцыяў, бо гэта было важна для беларускай справы.Аднак сёння час вымагае ад нас браць лідэрства на сябе дзеля абароны нацыянальных інтарэсаў, інтарэсаў беларускага народу», — заяўляе кіраўніцтва Партыі.
«Сёння беларусы могуць разлічваць толькі на сябе. Таму мы заклікаем усіх, каму неабыякавы лёс нашай краіны, далучацца да ініцыятыўнай групы кандыдата ў прэзідэнты ад Партыі БНФ Рыгора Кастусёва», — сканчваецца зварот.
Цяпер чытаюць
«Шпіён у кішэні»: расійскі месенджар Max сочыць за карыстальнікамі і дапамагае блакаваць VPN1
Каментары