На парадку дня шостай сесіі палаты прадстаўнікоў стаяць 36 пытанняў, у тым ліку дзевяць законапраектаў у першым чытанні, шэсць — у другім, а таксама 17 ратыфікацый міжнародных дагавораў, тры дэкрэты і кадравыя пытанні. Праект парадку дня будзе дапаўняцца па ходу сесіі, бо на дапрацоўцы ў камісіях знаходзяцца шэраг пытанняў.
На пасяджэнні савета ніжняй палаты 29 верасня намеснік старшыні парламенцкай камісіі па дзяржаўным будаўніцтве, мясцовым самакіраванні і рэгламенце Генадзь Грыцкевіч зазначыў: праект парадку дня шостай сесіі «дастаткова насычаны і патрабуе стараннай працы дэпутатаў».
Ужо на пленарным пасяджэнні 4 кастрычніка дэпутаты разгледзяць 12 пытанняў, у тым ліку восем ратыфікацый міжнародных дагавораў, папраўкі ў законапраект «Аб органах унутраных спраў Рэспублікі Беларусь» і іншыя.
Нагадаем, 7 і 14 верасня дэпутаты палаты прадстаўнікоў збіраліся на нечарговую сесію. На ёй было прынята рашэнне аб прызначэнні прэзідэнцкіх выбараў на 19 снежня, а таксама ў двух чытаннях быў прыняты праект бюджэту на 2011 год.
Верхняя палата парламента — савет рэспублікі — плануе 4 кастрычніка разгледзець 17 пытанняў, у тым ліку законапраекты аб рэспубліканскім бюджэце на 2011 год.
Парламентарыям таксама трэба будзе абмеркаваць пытанне аб прызнанні паўнамоцтваў і датэрміновым спыненні паўнамоцтваў асобных членаў савета рэспублікі і ўнесці змены ў рэгламент верхняй палаты.
Каментары